Piştî biryara “bûtlana teqez” a ku derbarê Komcivîna Asayî ya 38’emîn a CHP’ê de hat dayîn, li gelek bajaran û di serî de li Stenbol, Îzmir, Edene û Rizeyê welatî li ber rêxistinên bajar û navçeyan ên CHP’ê hatin cem hev.
Welatiyên ku li ber avahiya Serokatiya Bajarê Stenbolê ya CHP’ê kom bûn bertek nîşanî biryarê dan. Serokê Bajarê Stenbolê yê CHP’ê Ozgur Çelîk di daxuyaniya xwe de diyar kir ku li Tirkiyeyê demokrasî tê xwestin ku were rawestandin. Çelîk got: Hişmendiyek heye ku hewl dide sindoqê ji ber gel birevîne. Em ê tu carî rê nedin vê yekê.
Hat dîtin ku wêneya Kemal Kiliçdaroglu ya ku di avahiya bajêr de bû, bi ala CHP’ê hat girtin. Hat ragihandin ku Rêxistina CHP’ê ya Stenbolê bi 39 serokên navçeyan re civînek pêk aniye û piştî wê bi nûnerên baroyê re hevdîtin kiriye.
Li navçeya Findikli ya Rizeyê, Şaredarê CHP’î Ercument Şahîn Çervatoglu bang li gel kir ku bibin yek. Çervatoglu got, Em ê tu carî dest ji têkoşîna xwe ya maf, hiquq û dadê bernedin” û gel vexwend piştevaniyê ya li ber Serokatiya Navçeyê ya CHP’ê.
Serokê Bajarê Edeneyê yê CHP’ê Anil Tanburoglu jî li ber avahiya bajêr bang li endamên partiyê kir û diyar kir ku dê têkoşîna xwe bidomînin û got, Partiya Gel a Komarê (CHP) dê bibe desthilatdar. Tanburoglu anî ziman ku ew li benda nexşerêya ku dê Serokê Giştî Ozgur Ozel û Lijneya Rêveberiya Navendî (LRN) eşkere bikin in.
Li Îzmirê jî welatî li ber avahiya CHP’ê ya bajêr kom bûn. Serokê Bajarê Îzmirê yê CHP’ê Çagatay Guç di civîna ku bi dirûşman berdewam kir de axivî û got dê têkoşînê bi “biryardarî” bidomînin. Guç diyar kir ku ew li benda daxuyaniyên ji Navenda Giştî ne û bal kişand ser hişê hevpar û tevgera rêxistinkirî.
