Komîteya TEV-ÇAND’ê ya PKK’ê nerazîbûn nîşanî êrîşên demên dawî yên li ser çanda Kurd da, ku ji aliyê rejîma AKP-MHP’ê ve tê kirin û bang li her kesî kir ku beşdarî xeleka govendê bibin.
Daxuyaniya TEV-ÇAND’ê bi vî rengî ye:
“Li hemberî çand, ziman û hunera Kurdî ji aliyê desthilata AKP-MHP’ê ve êrişên nijadperest-faşîst tên kirin ku li cîhanê mînakên xwe kêm hatine dîtin.
Her kesek pir vekirî û eşkere dibîne ku em bi rejîmeke qirkirinê re rû bi rû ne ku dijminê tiştên Kurdî ye.
Ji bo tenê hiştina gerîllayê ku bi lehengî li hemberî êrişên dagirkeriyê yên leşkerî li ber xwe dide dixwazin çavên gel bitirsînin. Ji ber ku têkçûna xwe ya di vî şerî de dîtin, di çarçoveya konsepteke taybet de li dijî nirxên çandî dest bi êrişan kirin.
Ligel ewqasî derfetên xwe ku di qada çand û hunerê de bi xwe ne bawer in, êrişî nivîsên Kurdî, stranên Kurdî, kesên govendê digerînin, dawetan, hunermendan dikin û bi zextên faşîzan hewl didin mafên gel ên herî xwezayî tune bikin. Bi van pratîkan dixwazin tevahiya hêzên azadî û demokrasiyê bêdeng bikin.
Ango sedemeke girîng a ewqasî êrîşkirina çand, ziman û hunera Kurdî jî ew e ku şahî û konserên ku dewleta Tirk bi armanca bişaftinê yên weke pratîkên şerê taybet dixe meriyetê çawa di mînakên Cizîr, Sefînê û li Berxbirê hate dîtin, di aliyê gel de bê bersiv man û encam nedîtin e.
Tiştên ku bi destê DAÎŞ’ê nikarîbûn bikin hewl didin ku bi êrîşên çandî pêk bînin. Rexmê ku bi hezaran Êzidî di qirkirinê derbas kirin gelê me yê Êzidî ji çand û baweriya xwe piçikekî jî tawîz nedaye. Îro jî çi tawîzeke çandî ku gelê Kurd bide nîne. Çand jîn e, exlaq e, rûmet e. Ji van tawîz nayê dayîn.
Bi milyonan mirovên ku qadên Newrozan dadigirin nikarin bavêjin girtîgehan; zindan, gef, zext nikare çand, ziman û hunera Kurdî asteng bike.
Divê gelê Kurd bi tenê neyê hiştin!
Divê neyê ji bîr kirin ku yên ku tehemilî Delîloya Kurdan nakin sibeh ew ê li Horona Lazan, Tirkan jî heman êrîşan pêk bînin. Bila gumana kesî ji vê nebe. Ji ber ku ev êrîş karên Tirkîtiya Spî ne.
Ev her cure çalakiyên kembax ên bi armanca bazirganiyê yan jî bi armanca şerê derûniyê têne kirin, ku mirov ji nirxên xwe yên cewherî û ji çanda xwe dûr dixe ku çi têkiliya xwe bi çanda Kurd an jî Tirkan re nîn e di bin navê hunerê de teşwîq dikin. Lê dema ku Rêber APO Manîfestoya Çareseriya Demokratîk îlan kir qala xwişk û biratiya Delîlo û Horonê kiribû. Îro li ser navê xwişk û biratiyê divê hemû gel li cem gelê Kurd be û helwestê nîşan bide.
Li welatekî ku kesên bi Kurdî stran dibêjin têne lînçkirin, qetilkirin û girtin her xebata ku li ser navê hunerê tê kirin hêja ye. Di pêvajoyekê bi vî rengî de em hunermendên bihest ên welatparêz û demokrat ên ku li hemberî êrişên çandî bersivan didin û helwesta bi rûmet a gelê me silav dikin. Em banga her kesî dikin ku teqez bi cil û bergên xwe yên Kurdî derkevin kolanan, qadan, govendên azadiyê bigerînin û bi tîlîliyan stranên Kurdî berz û bilind bikin. Û em banga ku vê pêvajoyê bizivirînîne serhildana çandê dikin.
Bila dengê me heta Îmraliyê biçe, dîwarên Îmraliyê hilweşîne!
Divê em vê pêvajoya êrişên faşîzan bi ruhekî berxwedan û serhildanê ku bikaribe qirkirina çandî bi giştî ji holê rake pêşwazî bikin!”
