Siyasetmedar Dr. Hişyar Ozsoy şandina heyeta ‘Komîsyona Çareseriyê’ ji bo Îmraliyê ji ANF’ê re nirxand û anî ziman ku biryara komîsyonê ya serdana Îmraliyê ji aliyê smebolîk û pratîkî ve gelekî girîng e.
Ozsoy destnîşan kir ku hevdîtina bi Rêber Apo re wê pirsgirêka muxatabiyê di asteke mezin de çareser bike ku yek ji sernavên sereke yên nîqaşa di pêvajoya çareseriyê de bû.
Dr. Hişyar Ozsoy got, “Bi vî rengî nîqaşa li ser muxatabî û rewatiyê di asteke girîng de dikare ji holê bê rakirin. Hevdîtina komîsyona li meclîsê ya li Îmraliyê bi Birêz Abdullah Ocalan re wê ji aliyê rêveçûna pêvajoyê ve girîng be.”
‘HELWESTA CHP’Ê ŞAŞITIYEKE DÎROKÎ YE’
Ozsoy tevlîbûneke kêm a CHP’ê li komîsyonê weke “şaştiyeke dîrokî” pênase kir û anî ziman, partiyeke ku di rûdana meseleya Kurd de berpirsyariya xwe heye, divê ji bo çareseriyê bi roleke hîn çalak û xurt rabe.
Hişyar Ozsoy got, “Her kes xwedî wê berpirsyariyê ye ku derdoreke berfireh li dora wê maseyê, di nava wê atmosfera diyalogê de bihêlin.”
