Ji Qibûr El Qeracinê ya gundewarên Til Temir heta Zirgan, Qamişlo û Çilaxa herêmên cuda yên Parêzgeha Hesekê, ji ber bûyera şewitandina ala kurdî li bajarê Hesekê piştî nimêja Înê (2 Cotmehê), êrişa li ser sembolên neteweyî yên gelê Kurd çalakiyên gelêrî û siyasî yên protestokirinê hatin lidarxistin.
TIL TEMIR
Li bajarokê Qibûr El Qeracinê ya girêdayî bajarê Til Temir şênî li pêşiya avahiya meclisa bajarokê bi beşdariya dehan endamên saziyên civaka sivîl, nûnerên partiyên siyasî û rêxistinên jinan çalakiyeke protestokirinê li dar xist.
Di çalakiyê de ji hêla Hevseroka Meclisa Bajarokê Qibûr El Qeracinê Reşa Elo ve daxuyaniyek hat xwendin, di daxuyaniyê de hat diyarkirin ku gelê Kurd pêkhateyeke resen û xwedî hebûneke dîrokî û çandî ye, êrişa li ser alê ne tenê hedefgirtina sembolekê ye, ew êrişa li ser nasnameya gel û bîra nifşane.
Di daxuyaniyê de banga naskirina destûrî ya bi nasnameya neteweya gelê Kud û zimanê kurdî hat kirin, her wiha berpirsyartiya parastina rûmeta hemû Sûriyeyan û hesabxwestina ji berpirsyarên kiryaran hat xwestin.
ZIRGAN
Li bajarê Zirganê xwepêşandanek hat lidarxistin, bi sedan şênî beşdarî xwepêşandanê bûn. Xwepêşandan ji pêşiya Firina Jinê heta Çerxerêya Şaredariyê dewam kir, di xwepêşandanê de pankartên bi van nivîsan “Na ji êrişa ser sembolên gelan” û “Şewitandina alan reftara xerabkarane û parçebûnê çêdike” hatin rakirin.
Li ber çerxerêyê xwepêşander deqeyeke rêzgirtin rawestiyan, bi zimanê kurdî û erebî ji hêla endamê Meclisa Zirgan ve Dilyar Ebdê û Delal El Hemîd ve daxuyaniyek hat xwendin.
Di daxuyaniyê de hat destnîşankirin ku ala kurdî ne tenê reng in, ew beşeke ji dîrok, çand û nasnameyê ye, bi xwe re wateyên hêvî û berxwedanê radike, kiryarê şewitandina alê di navbera gel de fitneyê ava dike.
HESEKÊ
Li aliyeke din Meclisa Jin a Tevgera Civaka Demokratîk (TEV-DEM) li bajarê Hesekê daxuyaniyek da, daxuyanî ji hêla berdevka meclisê ya li Hesekê Efaf Hesekê ve hat xwendin.
Di daxuyaniyê de hat diyarkirin ku ew bi tundî van nêzîkatiyên “şofînist û nîjadperest” şermezar dikin, ev reftar ne li gorî nirx, exlaq û ti qanûnan e.
Meclisê di daxuyaniya xwe de da zanîn ku mîna van kiryaran pêkhateya Kurd tenê hedefnagire, ew rageşî û nakokiyê di navbera gelan de ava dike, pê re jî gefê li aştiya civakî dixwe, divê hikumeta veguhêz kesên ku ev kiryar kirine dariznîn.
Têkildarî heman mijarê bi dehan şêniyên bajarê Hesekê, li pêşiya Navenda Tevgera Çand û Hunera Demokratîk a Mezepotamya (TEV-ÇAND) kom bûn, êrişên li ser al û sembolên kurdî şermezar kirin.
Di kombûyînê de pankartên girêdana bi mafê çandî û zimanî jî hatibûn rakirin, pê re jî alên û sembolên kurdî hatin rakirin. Her wiha bi zimanê kurdî û erebî daxuyanî hat xwendin, di daxuyaniyê de daxwaza hesabxwestinê ji kesên ku ev kiryar kirine hat xwestin.
QAMIŞLO
Kongra Star a li taxa Enteriyê ya li bajarê Qamişlo jî, li Pakrewangeha Şehîd Delîl Sarûxan a li Qamişloyê daxuyaniyek da, daxuyanî ji hêla endama Kongra Star Evîn Mihemed ve hat xwendin.
Di daxuyaniyê de hat destnîşankirin ku bûyera li Hesekê rû da, wekhevî, jiyana hevbeş a di navbera Kurd û Ereban hedef digire, ew bi tundî êrişa li ser ala kurdî red dikin, al temsîla tişta herî pîroz ji bo gelan dike, ji bo rakirina wê şehîd xwîna xwe dane.
Kongra Star a taxê di daxuyaniya xwe de da zanîn ku divê aliyên peywendîdar parastin şêniyan bikin.
Meclisa Taxa Aşûriyê ya li bajarê Qamişlo jî li pêşiya avahiya meclisê daxuyaniyek da, daxuyanî bi zimanê kurdî ji hêla Endama Kongra Star Xebat Beşîr û bi zimanê erebî ji hêla endamê meclisê Efram Somê ve hat xwendin.
Di daxuyaniyê de hat diyarkirin ku kesên ku bûyera êrişa li ser ala kurdî pêk anîn berpirsyartiya fitneya ku dibe radike, divê nasnameya pêkhateyan neyê paşguhkirin û rê li pêşiya derxistina fitneya di navbera Kurd û Ereban bê girtin.
ÇILAXA
Li bajarê Çilaxa jî Înîsiyatîfa Gel bi beşdariya girseyeke gel a şêniyên bajar û ji pêkhateyên cuda, malbatên şehîdan, nûnerên partiyên kurdî, saziyên sivîl û tevgerên jinan, li pêşiya Navenda Meclisa Malbatên Şehîdan a Bajarê Çilaxa daxuyaniyek da.
Daxuyanî ji aliyê Endama Meclisa Malbatên Şehîdan a Bajarê Çilaxa Ahîn Şiwêş ve hat xwendin, di daxuyaniyê de hat destnîşankirin ku piştî ew qas salên şer, kuştin û koçkirinê Sûriyeyê bi hacetî istiqrar, aştî û ewlehiyê ye, divê rê li ber derxistina fitne û şer bê girtin, hinek aliyên girêdayî hêzên derve bi rêya istîxbaratê de dixwazin pêvajoya entegrasyonê vala derxînin, destketiyên gelê Kurd ji holê rakin.
