Li tevahiya cîhanê jin xwe amade dikin ku 8’ê Adarê pêşwazî bikin. Li Kurdistanê jî jin wê careke din bi gotina ‘Aştî û azadî’ dakevin qadan.
Aktîvîsta Tevgera Jinên Azad (TJA) Seval Bîlgîn li ser 8’ê Adarê Roja Jinan a Cîhanê ji ANF’ê re axivî û got, “8’ê Adarê ji bo jinan raperînek e. Hûn jî zanin destpêka têkoşîna jinê ye ku piştî 129 jin ên karker hatin qetilkirin destpê kir û bi sedan salan dewam kir. Li Tirkiyeyê 8’ê Adarê di sala 1927’an de bi keda jinê bi cih bû. Li hemberî mejiyê serweriya mêr û mêtingeriyê ji hingî ve li tevahiya cîhanê em weke roja berxwedana jinan pênase dikin.”
FELSEFEYA ‘JIN, JIYAN, AZADÎ’ BU ÇAVKANIYA HÊVIYÊ JI HEMÛ JINAN RE
Seval Bîlgîn anî ziman ku jinên li cîhanê li dora felsefeya ‘Jin, Jiyan, Azadî’ bi rêxistin bûne û got, “Piştî ku Jîna Mahsa Amînî hate qetilkirin ne tenê li Tirkiye û Rojhilata Navîn her wiha li tevahiya cîhanê felsefeya ‘Jin, Jiyan, Azadî’ deng veda û ji bo jinan bû qîrîn, berxwedan û azadî. Ev felsefe bû hêviya jinan li tevahiya cîhanê. Bi saya vê yekê jin li hemberî serweriya mêr û desthilatdariyê bûn yek deng. Em vê felsefeyê êdî li her qadê dibihîzin.
Jin têne qirkirin. Jin her roj li kuştinên jinan rast tên. Ji ber vê yekê em li kolanan e, em li qadan e. Li dijî vê qirkirinê em têdikoşin. Mixabin kuştina jinan her roj zêde dibe. Sedema vê jî polîtîkaya bêcezahiştina kujeran e. Em jin, li dijî vî şerê li hemberî xwe em ê li qadan bin. Jin jiyanê, edaletê dixwazin. Em ê bi van daxwazên xwe li qadan bin.”
‘EM Ê LI QADAN DAXWAZA AŞTIYÊ BIKIN’
Seval Bîlgîn ‘Banga sedsalê’ ya Rêber Apo bi bîr xist ku 27’ê Sibatê kir û got, “Li Amedê kelecanek heye, hûn jî zanin ‘Banga sedsalê’ hate kirin. Ev bang bi taybetî ji bo me jinan gelekî girîng e. Bi dîtina min ev pêvajo kelecaneke cuda tevlî 8’ê Adarê dike. Em jin, em ê li qadan daxwaza aştiyê bînin ziman. Ji ber ku 8’ê Adarê ne atmosfereke ku tenê kuştina jinan lê tê axaftin. 8’ê Adarê dema qîrîna daxwazên jinê bi rengê azad e.”
