Ev 5 meh e Beşar Esed ketiye û Ehmed El Şeri hatiye ser desthilatê. El Şeri hêzên artêşê û yên ewlekariyê fesih kirin û vê jî valahiyek li herêmên serweriya wî çêkir û hêzên leşkerî yên welat kontrol kirin rûbirûyî astengiyên mezin hatin, nexasim li ser astên ewlehî û aborî. Piştî hilweşîna rejîmê li tevahî herêmên desthilata Şamê kaosekê xwe da der.
Sûc zêde bûn, kiryarên tesfiyekirin û komkujî li ser bingeha nasnameya mezhebî û tevlêbûna li nava rejîma berê zêde bûn û êdî welat ber bi şerekî navxweyî ve ye.
Navenda Çavdêriya Mafên Mirovan a Sûriyeyê (SOHR) diyar kir ku ji 8’ê Kanûnê heta 7’ê Gulanê 7 hezar û 342 kes li sersnserî Sûriyeyê di rewşên cuda de hatine kuştin, ji wan 5 hezar û 514 sivîl in; 4 hezar û 852 zilam û xort, 402 jin û 260 zarok in.
SOHR’ê, di 5 mehan de 2 hezar û 92 sûcên tasfiyekirina meydanî belge kirin, piraniya wan di meha Adarê de bûn. Hemwextî wê çekdaran li perava Sûriyeyê li dijî rêbendên kontrolê yên Wezareta Parastinê û Wezareta Karên Hundirîn ên desthilata Şamê êriş pêk anîn. Bi taybetî di 6’ê Adarê de.
