Tevgera Azadiya Jinên Êzidî (TAJÊ) ji ber salvegera qetilkirina 19 jinên Êzidî li ber Meclîsa Gel a Şengalê daxuyaniyek da ku 19 jin di 3’ê Hezîrana 2016’an de ji ber ku guhertina ola xwe red kirin piştî êşkenceyeke giran li qadeke li Mûsilê di nava qefesê de hatin şewitandin û qetilkirin.
Berdevka TAJÊ Riham Hesen daxuyanî da û bi bîr xist ku di fermana 3’ê Tebaxê de gelek jinên Êzidî hatin revandin û 19 jin di 3’ê Hezîrana 2016’an de li ber çavên her kesî di hundirê qefesekê de hatin şewitandin.
Riham Hesen soza tolhildanê nû kir û got, “Bi navê TAJÊ em jinên hatin qetilkirin bi bîr tînin û soza tolhildanê dubare dikin. Em ê wan ti carî ji bîr nekin û nehêlin ku bêne jibîrkirin. Ya ku li civaka me hate kirin, mînakeke xwe di dîrokê de nîne. Em bang li rêxistinên jinan dikin ku ji bo edaletê dengê xwe bilind bikin.”
Riham Hesen destnîşan kir ku wê dengê jinên hatin qetilkirin ji bîr nekin, têkoşîna wan mezin bikin û got, “Ji bo edalet pêk were û yên ferman rakirin hesab dibin, em ê têkoşîna xwe dewam bikin.”
Daxuyanî bi dirûşmên “Rihê şehîdên jin sax be”, “Bijî berxwedana jinan” û “Jin, Jiyan, Azadî” bi dawî bû.
