Berdevka TJK-E’yê Ayten Kaplan anî ziman ku bi kampanya ‘Diyalogên bi jiyana azad re’ ji bo afirandina civaka demokratîk a li dora banga Rêber Apo wê nêrîna jinan werbigirin û piştgiriyê bidin pêvajoyê.
Bi pêngava ‘Azadî ji Rêber Apo re, çaerserî ji pirsgirêka Kurd re’ ku dostên gelê Kurd di 10’ê Cotmeha 2023’an de dabûn destpêkirin, di asta navneteweyî de çalakiyên mezin têne lidarxistin. Beşeke mezin a van çalakiyan bi pêşengiyan jinan pêk tên. Jin xwedî li paradîgmaya azadiya jinê ya Rêber Apo derdikevin û bi çalakiyan daxwaza azadiya Rêber Apo dikin. Bi nîqaşên li ser çareseriyê re ku li Tirkiyeyê ji meha Cotmehê ve dewam dikin, di hevdîtinên bi Rêber Apo re têkoşîna jinê derkete pêş. Rêber Apo peyameke taybet ji jinan re şand û girîngiya berxwedan û azadiya jinê careke din destnîşan kir. Tevgera Jinên Kurd a li Ewropayê (TJK-E) bi daxuyaniyekê ragihand ku li ser bingeha daxwaza azadiya Rêber Apo wan di nava pêngava navneteweyî de dest bi kampanyayeke nû kirine. Li gorî daxuyaniya TJK-E’yê, kampanya ku wê 3’ê Gulanê destpê bike, wê bi navê ‘Diyalogên bi jiyana azad re’ bê meşandin.
BI AZADIYA JINÊ RE CIVAK DIKARE DEMOKRATÎK BIBE
Berdevka TJK-E’yê Ayten Kaplan li ser kampanyayê bersiv da pirsên ANF’ê û anî ziman ku Rêber Apo bi banga 27’ê Sibatê re înîsiyatîfeke girîng hildaye ser milê xwe, vê pêvajoyê dimeşîne, lê belê ji bo demokratîkbûna civakê mîsyoneke girîng dikeve ser milê jinan. Ayten Kaplan destnîşan kir ku ew dixwazin paradîgmaya Rêber Apo belav bikin, nêrîn û pêşniyara derdorên cuda werbigirin û got, “Em ê di mijara jinê de platforman ava bikin, cihê jinan ê di nava civakê de nîqaş bikin, qebûlkirina nasname, îradeya jinê ya li nava civakî binirxînin. Civaka demokratîk tenê bi azadiya jinê û hebûna wê ya li nava civakê dikare pêk were.”
HER HERÊM WÊ LI GORÎ REWŞA XWE YA XWESER ÇALAKIYAN LIDAR BIXE
Ayten Kaplan anî ziman ku di çarçoveya kampanyayê de beriya destpêkirina çalakiyan wê rê û rêbazên wan nîqaş bikin, li gorî nexşerêyeke diyarkirî bi çalakiyên çandî û hunerî re wê nîqaş, atolye, çalakiyên li derve, meş û daxuyaniyên çapemeniyê jî di nav de plansaziyeke berfireh biafirînin.
Ayten Kaplan diyar kir ku her herêm wê li gorî rewşa xwe ya xweser çalakiyan bike, bûyerên rojane nîqaş bike û encamên gengaz ên rol û azadiya Rêber Apo ya di vê pêvajoyê de binirxînin.
Berdevka TJK-E’yê got, herêm wê dest bi amadekirina plansaziya xwe bikin û di 3’ê Gulanê de li gelek navendan wê meş bêne lidarxistin.
EM DIXWAZIN DERDORÊN CUDA TEVLÎ VÊ PÊVAJOYÊ BIKIN
Ayten Kaplan ragihand ku çalakî wê bi demê re berfireh bibin, dixwazin derdorên cuda jî tevlî vê kampanyayê bikin û diyar kir ku wê bi jinên Îranî, Asûrî-Suryanî, Ermenî re tevbigerin û got, “Wê li qadên xwecihî hevdîtin bêne kirin û îradeya jinê bigihîne hev. Ji bo afirandina civaka demokratîk a li dora banga Rêber Apo em ê nêrîna jinan werbigirin û piştgiriyê bidin pêvajoyê.”
Ayten Kaplan bi bîr xist ku li gel banga Rêber Apo dewletê hîn gaveke şênber neavêtiye û ji bo afirandina civaka demokratîk a rêxistinbûyî mîsyona girîng a Tevgera Azadiyê ya Jinê destnîşan kir. Ayten Kaplan got, “Eger em dixwazin guherîn û veguherînê pêk bîni, divê em bi rêxistinên cuda yên jinan re hevkariyê bikin.”
DIVÊ HER KES TEVLÎ VÊ PÊVAJOYÊ BIBE
Ayten Kaplan anî ziman ku her kes dikare tevkariyê li vê pêvajoyê bike û got, “Em bang li jinan û civaka xwe dikin ku tevlî van nîqaşan bibin. Her kes ji bo rêveçûna rast a vê pêvajoyê û birêxistinkirina civakeke demokratîk divê tevkariyê bike.”
