Serokê Giştî yê Tevgera Alimên Îslamî û Kurdistanî ya Hemdem û Nûjen) Hafiz Ahmet Tûrhalli destnîşan kir ku li dijî êrîşên dagirkeriyê yên li ser destketiyên gelê Kurd pêwîstî bi pêkanîna yekîtiya gelê Kurd heye.
Tûrhalli ji ANF’ê re axivî û bi bîr xist ku gelê Kurd 100 salî bê nasname û bê statu hate hiştin, di vê demê de berdêlên giran da û got, “Saddam ê zalim têk çû, Beşar têk çû. Ev yek qanûna Xwedê ye ku nayê guhertin; zilm li ser piyan namîne. Xwedê dibêje ‘Hûn ê bibînin bê zalim çawa serberjêr wê hilweşin’. Bi vê gotinê bi bîra me dixe ku mirovên li hemberî zilmê li ber xwe didin wê çawa bi ser bikevin.”
Tûrhalli bi dewamî got, “Gelê me 100 salî bê nasname û bê statu jiya. Di vê demê de êrîşên hovane lê hate kirin. Dewletên Sûriye, Tirkiye, Iraq û Îran ên dagirker bi navê ola Îslamê gelê me talan kir, yên ku daxwaza maf û nasnameyê kirin qetil kir û avêt zindanan. Di vê demê de gelê me bi sed hezaran şehîd da û berdêlên giran da.”
‘GELÊ KURD HETA MIRINÊ LI BER XWE DA’
Tûrhalli destnîşan kir ku gel û ciwanên Kurd sedan sal in heta mirinê li ber xwe didin û got, “Ti carî serî li ber dijmin netewand. Mirin, êşkence li wan hate kirin lê belê serî li ber dijmin netewandin. Îro jî rewşa li Rojava derketiye holê berpirsyariyê dide me ku em li ber xwe bidin û li ser şopa bi sed hezaran şehîdan bimeşin.”
Tûrhalli diyar kir ku li Iraq û Sûriyeyê rejîma Baas têk çû, lê belê eger gelê Kurd li gorî hevsengiyên navneteweyî stratejiyeke neteweyî ava nekin wê destketiyên wan bikevin nava rîskê û got, “Îro li çar parçeyan zilm li gelê me tê kirin, tê qetilkirin. Li Başûr heta astekê me azadî bi dest xist. Lê belê li dora vê azadiyê me nekarî yekîtiyê pêk bînin. Rojava ji bo vê firsendeke dîrokî ye. Divê em vê firsendê ti carî ji nedîtî ve neyên.”
‘EGER EM FIRSENDÊ BI KAR NÎNIN, WÊ RÎSK RÛ BIDIN’
Tûrhalli anî ziman ku gelê Kurd li Rojava bi berdêleke mezin û berxwedanê destketiyek afirandiye û got, “Kurdên li çar parçeyan û derveyî welat xwedî li vê pêvajoyê derketin. Rojava, gelê me modeleke rêveberiyê ya mînak ava kiriye û gihîştiye wê astê ku dikare xwe bi rê ve bibe, ku ev yek li cîhanê ispat kiriye. Îro li Rojava ji bo gelê Kurd firsendeke dîrokî afirî ye û divê ev firsend bê bikaranîn. Ev yek weke miletê Kurd berpirsyariya me hemûyan e. Xwedê her tim pêşniyara yekîtiyê dike. Pêxemberê me jî her tim girîngiya yekîtiya gel destnîşan kiriye û fermana wê rêyê daye me. Eger hêza me ji hev belav bibe, eger em nikaribin yekîtiya xwe ava bikin, ev firsenda li pêşiya me wê bibe rîskeke mezin.
Oldar, rewşenbîr, welatparêz, mirovên xwedî wijdan divê di vê dema krîtîk de wezîfeya xwe bi cih bînin û ji bo yekîtiyê bi berpirsyarî rabin.
Weke gelekî ku 10 sal in komkujî sirgûn, zindan û neheqî li me tê ferzkirin, divê em êdî bibin yek, yekîtiya xwe xurt bikin. Mirovên xwedî bawerî, Sûnî, Elewî, Êzidî, Asûrî, nûnerên hemû baweriyên li Kurdistanê divê pêşengiyê ji daxwaza yekîtiyê ya gel re bikin. Ji bo parastina nirxên xwe û paşeroja gelê xwe, eger em yekîtiya xwe ava nekin em ê 100 salên din neçar bimînin ku vê rewşê ji zarokên xwe re vebêjin. Divê xwedÎ li vê firsenda dîrokî bê derketin û em pêşengiyê jê re bikin. Yekîtiya gelê me wê paşeroja me ava bike û rêya azadiya me veke. Divê ev firsend bê bikaranîn, ev yek berpirsyariya hevpar a me hemûyan e.”
