Fermendara YPJ’ê Viyan Adar li ser hişmendiya sîstema hikumeta veguhêz a Şamê axivî û wiha got, ”Demên dawî û bi taybet piştî hilweşîna rejîma Baasê rewşên di Sûriyeyê de rûdidin cihê şermezariyê ye, kiryarên ku îro li ser jinan li herêmên Sûriyeyê rûdidin û bi taybet li Berava Sûriye û Siwêydayê û heta bi herêmên dîtir ku tê de bi rengek veşartî ev kiryar tên kirin. Lê niha tenê di asta Siwêydayê li pêş e. Lê ev rewşa ku di Sûriyeyê de qewimiye jê matmayî neman, ji ber ku hişmendiya ku paşeroja xwe ji ”El-Qaîde” û cîhadîst digre û yekser guhertinên ku çêkirine di dilê kesî de rûnenişt û bi taybet jinan ji vê yekê qet bawer nekir. Em ê xebatên xwe berdewam bikin, lê ev hişmendî ji despêka hatina desthilata veguhêz a ser desthilata Şamê û heta niha gel, civak û bi taybet jin li hember vê sîstemê bi guman in’.”
‘GER EV SÎSTEM WEKE BERÊ BIMEŞE WÊ TINE BIBE’
Fermendar Viyan li ser bûyer kiryarên li ser jinê hatine kirin axivî û wiha got, ”Bûyerên ku li Sûriyeyê rûdidin û bi taybet ên ku vê dawiyê li Siwêydayê rûdane, cihê êşên mezin in û em kêlî bi kêlî rewşê dişopînin. Her wiha ji ber ku me di dîroka de gelek rewşên bi vî awayî jiyan kirine û yê ku berê jiyan kirî zêdetir yên ku êşê dikşîne fêm dike. Bi taybet di serdemeke wek vê serdemê ku pêşketin û guhertinan di cîhanê de çêdibe. Ji bo kiryarên ku tên kirin bi zîhniyeta destdirêjî û cîhadîst bûyerên ku li dijî jin hatine kirin, qet ne li gorî serdemê ne. Ger ev sîstem jî li gorî serdema berê bimeşe wê tine bibe.”
DIVÊ JIN YEKÎNEYÊN XWEPARASTINÊ AVA BIKIN
Di berdewamiya axaftina xwe de fermendara YPJ’ê Viyan Adar tekez kir ku divê jin hêza xwe ya parastinê avabike û wiha domand, ”Rewşên ku di Sûriyeyê de rûdane ji me û tevahî jinên Sûriyeyê re nîşan da ku jin mecbûre ku hêzên xwe yên parastinê bide pêş. Mecbûre ku li hember vê zihniyetê yekîneyên xwe bide çêkirin. Ev hişmendî ne tenê li Sûriyeyê ye. Ji ber bi awayekî ber bi çav bi kiryarên dijwar ser jin de hatin vê dide xuyakirin. Ev hişmendî li tevahî cîhanê tê meşandin lê rê û rêbazên wê tên guhertin û gelek maf tên binpêkirin. Hewldana fikirandinê heye, lê azadiyeke rastî di jiyanî de heta niha pêk nehatiye. Taybet jin ne gihîştiye azadiya xwe a rast û di şexsê jinê de civak jî heye. Ji bo wê tekoşîna azadiyê wê her berdewam bike.”
‘DAYIKA FEWÎZYE XWE Û GUNDÊ XWE PARAST’
Viyan Adar di nav axaftina xwe de anî ziman ku bûyerên ku niha tên jiyîn metirsiyên mezin ên li ser pêşeroja jin û civakê dide nîşandan û got, ”Ev kiryar û bûyerên ku niha tên jiyîn di şexsê jinê de li ser civakê jî metirsiyên mezin avadike, da ku em metirsiyê ji holê rakin divê hemû jin di hemû parezgehanên di Sûriyeyê yekîneyên xwe yên parastinê avabikin. Ne şerte ku hejmar be, li gorî pêwîstiya xwe xweparastinê ya ku mafeke rewa ye avabikin. Xweparastin mafeke rewa ye hemû jin li her derê xwe bighînin hev û xwe birêxistin bikin û parastina xwe xurt bikin. Zilam jî di bin sîstema zihniyetperest de zilmê dibîne divê ew jî li kêleka jinê tekoşîna azadiyê bidin meşandin. Ji ber ku ev mijareke pêşerojê ye, ji bo wê em her yek ji mal, gund û kolana xwe, xweparastina xwe xurt bikin. Mînaka wê jî hene, weke dayika li Siwêyda Fewîzye Fexir El-Dîn di dema êrîşên ser gundê wan çêbû wê kêliyê de biryar da ku ew ê bê rûmetiyê qebûl neke û parastina xwe û gundê xwe pêşxist û gihîşt asta şehdatê. Her wiha li Bakur û Rojhilatê Sûriyeyê gelek nûmûneyên bi vî awayî hene.”
‘XWEPARASTIN NEBE WÊ EW Ê JÎ NEBIN’
Di dawiya axaftina xwe de fermandara YPJ’ê Viyan Adar da xuyakirin ku eger jin xwe bi rêxistin û xwe parastinê pêşnexin wê rojane di bin gef û xeteriyên mezin de bin û axaftina xwe wiha bi dawî kir: ”Eger jin li her derê sîstema xweparasatin û xwerêxistikirinê nedin pêş, wê jin rojane rastî gef û xeteriyên mezin werin. Em jî jiyaneke bi vî awayî qebûl nakin. Her wiha baweriya me jî heye ku wê dayik û xwişkên me li Siwêyda û hemû bajarên din jî helwesta xwe diyar bikin. Têgihîştine ku eger parastin nebe wê ew ê jî nebin û ji bo wê her yek li cihê xwe çeka xwe radike, ji ber bewariya xwe aniye ku eger çek raneke ew ê tine bibe. Ev biryarên wan pir hêja ne, em jî her gavê bi hemû jinên di bin zilm û zorê de ne û bi taybet li Siwêyda û Berava Sûriyeyê.”
