Di daxuyaniyên ku li her du bajaran hatin dayîn de, daxwaza desketiya statuya Kurdî û mafê perwerdehiya bi zimanê dayikê derket pêş.
Li navenda bajarê Colemêrgê gelek kes tevlî daxuyaniyê bûn û pankarta “Statuya Kurdî, perwerdehiya bi Kurdî” û dirûşma “Bê ziman jiyan nabe” gelek caran hate berzkirin.
Hevserokê DEM Partiyê yê Colemêrgê Kadîr Şahîn daxuyanî xwend. Şahîn diyar kir ku bi milyonan zarokên Kurd ên li Tirkiyeyê dijîn ji mafê perwerdeya bi zimanê dayikê mehrûm mane û got: “Lê ev maf mafekî gerdûnî û sereke ye. Ev maf, bi gelek peymanên navneteweyî hatiye misogerkirin. Lê ji ber ku dewleta Tirk bi peymanên navneteweyî yên îmze kiriye nake, ev helwesta rayedarên Tirk rê li ber pirsgirêkên civakî vedike û civakê bêhizûr dike. Heta ku mafên çandî, zimanî û nasnameyî yên Kurdan ku mafên herî rewa û sereke ne û heta hemû maf û azadiyên wan tên misogerkirin em ê têkoşîna xwe ya çand, ziman û nasnameyê bidomînin.”
Daxuyanî, bi gotina stranan û gerandina govendê bi dawî bû.
Li Şemzînanê jî li pêşiya avahiya DEM Partiyê daxuyanî hate dayin. Parlamenter Onur Duşunmez, endamên partiyê û nûnerên rêxistinên civaka sivîl tev li bûn. Beşdarên mêr şel û şepik û jinan jî kiras û fîstan li xwe kiribûn. Di daxuyaniyê de dovîzên “Dem Dema Kurdî ye”, “Ziman rûmet e” û “Bi Kurdî biaxivin, bixwînin û binivîsin” hatin hilgirtin.
Hevserokê DEM Partiyê yê Şemzînanê Agît Tekîn daxuyanî xwend. Daxuyanî, bi dirûşma “Bê ziman jiyan nabe” bi dawî bû.
