Yekîtiya Jinên Elewî yên Demokratîk (YJAD) derbarê nûçeya kovara Der Spiegel a li ser jinên Kurd hatiye weşandin de daxuyaniyek nivîskî weşand. Di daxuyaniyê de nûçe bi tundî şermezar kir û hat diyarkirin ku ew berhema zîhniyeteke zayendperest, manîpulatîf û faşîst e.
YJAD’ê bi bîr xist ku Der Spiegel demek dirêj e xwe wekî weşaneke çepgir, demokratîk û azadîxwaz pênase dike û daxuyand ku zimanê nûçeya dawî ya ku jinên Kurd hedef digire bi eşkereyî bi vê îdiayê re nakok e. Di daxuyaniyê de hat destnîşankirin ku ev rêbaz pratîkên dîrokî yên faşîst, biçêkxistin û zayendperest ên wekî birîna porê jinan ji nû ve diafirîne, mîrateya tarî ya polîtîkaya tundiyê ya li dijî jinan dema Şerên Cîhanê yên Yekem û Duyem tîne bîra mirov.
Di daxuyaniyê de hat destnîşankirin ku nûçeya ji aliyê Der Spiegel ve hatiye weşandin nayê qebûlkirin û da zanîn ku kesên ku nûçe amade kirine bi nêzîkatiyek rojnamevanî ya li ser bingeha derew û manîpulasyonê tevgeriyane.
YJAD’ê bang li Der Spiegel kir ku tavilê nûçeyê rake, berpirsiyarên ku nûçe amadekirine eşkere bike, cezayên pêwîst pêk bîne û bi eşkereyî ji jinên Kurd û jinên li çaraliyê cîhanê lêborînê bixwaze.
Di daxuyaniyê nêzîkatiya rojnamevanî ya ku zîhniyeta DAÎŞ’ê ji nû ve diafirîne red kir û bang li civaka Elman, gel, komên baweriyê, jinan û parêzvanên mafên jinan ên li Elmanya dijîn kir ku li dijî weşanên wiha hevgirtin û nerazîbûn nîşan bidin.
Daxuyanî bi van gotinan bi dawî bû: “Jiyan, rûmet û azadiya jinan ne mijara bazaran e. Heqîqet wê bi ser bikeve, jin wê bi ser bikevin.”
