Koordînasyona Ragihandina Jinên Azad (RAJIN) derbarê qetilkirina rojnamevan Cîhan Bîlgîn û Nazim Daştan ên ku di êrîşa dewleta Tirk a dagirker de şehîd bûn, daxuyaniyek da.
Daxuyaniya Koordînasyona RAJIN’ê bi vî rengî ye:
“Li kêleka siyaseta qirkirinê ya ku dewleta Tirk bi salane li hemberî gelê Kurd dimeşîne, ev 14 salin jî li hemberî Şoreşa Rojavayê Kurdistanê û destkeftiyên wê êrîşên bê navber pêktîne. Yê ku herî zêde xwest feyde ji aloziya Sûrî bibîne û ji xwe re bizîvirîne firasenda dagirkirina herêmê, Dewleta Tirk bû. Ev yek jî xwest ku bi riya çeteyan bike û li gelek herêmên Sûrî ev yek kir jî, di salên destpêka aloziya Sûriyeyê de bajarên Cerablus, Raî, Ezaz û Babê yên bakurê rojhilatê Helebê dagir kirin. Lê li herêmên Bakur û Rojhilatê Sûriyeyê di bin serweriya Rêveberiya Xweser de yekser nekarî vê yekê pêk bîne. Şoreşa Rojava li hemberî vê daxwaza dewleta Tirk astengiyeke mezin. Her wiha sîstema rêveberiya xweser jî ji bo xwe xeteriyeke mezin dît. Di dema êrîşên çeteyên DAÎŞ’ê ya li ser Şoreşa Rojava-Bakur û Rojhilatê Sûriye de, dewleta Tirk bi riya DAÎŞ’ê dixwest ku şoreşê têk bibe û gelê herêmê di qetlîaman re derbas bike. Lê di hemwextî têkbirina DAÎŞ’ê de dagirkeriya dewleta Tirk kete wê ferqê ku şerê wê yê bi rêya DAÎŞ’ê bi dawî dibe û DAÎŞ têk diçe, lewma bi xwe destwerdan kir û êrîşên rasterast li dijî Rojava dan destpêkirin. Di 2018′an de Efrînê û di sala 2019′an de Girê Spî û Serêkaniyê dagir kirin. Rejîma Tirk dixwaze Mîsaqî Millî pêk bîne ku li gorî xeta ji Heleb heta Musil û Kerkûkê, milkê Osmaniyan dibîne.
Ji bo ku yekser bertekên raya giştî li hember xwe kom neke, xwest ku gav bi gav êrîşên xwe yê bi armanca dagirkirin û qirkirinê pêk bîne. Di destpêka 2018’an de êrîşên bejahî û asîmanî li ser Efrînê dan destpêkirin, piştî wê sal û nîvek êrîşên bi armanca dagirkirinê li hember Serê Kaniyê û Girê Spî dan destpêkirin. Ji xwe Erdogan fermana ku jin be jî zarok be jî lê din dabû. Li hemberî sivîlan, jinan, zarokan kiryarên hovane ku heya niha jî li herêmên ku dagirkirye pêk tîne. Êdî aşkera bû ku Tirkiye li ser şopa DAÎŞ′ê dimeşe.
Bi hilweşîna rejîma Esad re careke din dewleta Tirk li ser esasê dijminatiya Kurdan li Sûriyeyê bi çeteyên girêdayî xwe re şerekî mezin dimeşîne. Hewl dide zêdetir beşdarî pêvajoya li Sûriyeyê bibe. AKP a ku xwedî heman zîhniyeta çeteyan e, jixwe desthilatdar e û ji bo Sûriyeyeke bi zîhniyeta DAÎŞ’ê li kêleka xwe ava bike, her tiştî razandiye.
Dewleta Tirk ji bo xwe rojnamevaniya azad li her derê xeter dibîne û dike hedef, li Rojavayê Kurdistanê jî hewil dide dengê rojnamevanan qut bike. Destpêkê bi gefan, dema ku rojnamevanên ragihandina azad guh nadin vê yekê, vê carê jî bi îmhakirina fîzîkî yekser hedef digre; mînaka vê jî hevreyên me Gulistan, Hîro, Nûjiyan, Denîz, Dilîşan û Rizgar, îro jî hevrê Nazim Daştan û Cîhan Bîlgîn hedef girtin.
Zêdeyî 40 sal in tevî êrîşên kontra û çeteyên JÎTEM’ê, Çapemeniya Azad dev ji ragihandina heqîqetê berneda. Dema ku hevkarê Dewleta Tirk DAÎŞê li gelek deverên Rojhilata Navîn hovîtî pêk anî, herî zêde xebatkarên Çapemeniya Azad rastî ragihandin. Denîz û Nûjiyan bûn pêşengên vê têkoşînê. Kiryarên hovane yên DAÎŞ’ê yên li Şengal, Kobanê û Reqayê ji cîhanê re ragihandin. Li ser hesabê canê xwe dev ji ragihandina heqîqetê bernedan.
Nazim û Cîhan, weke du rojnamegerên ciwan hîn di salên destpêkê yê şoreşa Rojava, ji bakurê kurdistanê berê xwe dabûn Rojava, xwestin ku têkoşîn û berxwedaniya li Şoreşa Rojava ya li hemberî êrîşên hovane yên dewleta Tirk û çeteyên wê, ji raya giştî re ragihînin. Li kuderê şer û êrîş, li wir Nazim û Cîhan dibûn dengê heqîqetê. Li Kobanê bûn, li Efrîn bûn, li Eyn Îsa bûn, li Girê Spî û Serê Kaniyê bûn. Herî dawî jî ji 8’ê Kanûnê (2024) ve li Bendava Tişrîn û Pira Qereqozaxê bûn ku li wê derê bûn hedefa êrîşa balafirên dewleta Tirk a dagirker. Nazim û Cîhan Bi Rojnamevaniyeke lehengane bûn dengê her kêliyeke berxwedana Rojava. Di her şerekî de li kêleka şervanan bi kamera û pêşkêşvaniya xwe sekinîn, bûn deng û rengê heqîqetê, bûn deng û rengên ragihandina azad.
Hinek rêxistin, sazî û însiyatîfên rojnamevanan di asta cîhanê de jî daxuyanî didin û dibêjin ku hedefgirtina rojnemevanan sûc e. Ev tesbîteke raste, lê êdî tenê tesbîta vê kirin ne bes e, pêwîste ku ji bo xwediyên vî sûcî di dadgehên cîhanê de werine darizandin hemû rojnamevan ji bo vê têkoşîn bikin. Dewleta Tirk di cîhanê de ji xeynî sûcên qirkirinê yên li hemberî gelê Kurd, dewleta ku herî zêde rojnamevanan qetil dike. Em bang li hemû sazî û dezgehên ku bi navê mafên mirovan, mafên jinan û mafên rojnamegeran dixebitin dikin ku li hemberî sûcên dewleta Tirk bêdeng nemînin û em ji bo van sûcan xebatên dana darizandinê bikin.
Em jî weke Ragihandina Jinên Azad (RAJIN) qetilkirina her dû hevrêyên xwe şermezar dikin. Ew jî tevlî karwanên şehîdên ragihandina azad bûn, em di şexsê hevrê Nazim û Cîhan de bejna xwe li ber keda hemû şehîdên ragihandina azad ditewîtin, sersaxî ji malbatên wan û tevayî rojnemevanên ragihandina azad re dixwazin. Em careke din soza xwe nû dikin ku di şopa wan de em ê dengê ragihandina azad bilindtir bikin û serkeftin û pêşveçûnê ji bo xwe esas bigrin.”
