Ji raya ya navneteweyî bertekên li dijî êrîşên li ser herêmên di bin rêveberiya Rêveberiya Xweser a Bakur û rojhilatê Sûriyeyê yên ji aliyê dewleta Tirk û çeteyên girêdayî wê ve berdewam dikin. Senatorê Fransî Pascal Savoldelli, ji bo ku balê bikişîne ser êrîşên li dijî Rojavayê nameyek ji Wezîrê Karên Derve yê Fransayê Jean-Nole Barrot re nivîsî. Savodelli diyar kir ku modela rêveberiyê ya berfireh û demokratîk a Rojavayê divê di jinûveavakirina Sûriyeyê de bibe mînak û bangî Fransayê kir ku hevalbendên xwe yên Kurd tenê nehêle.
ROJAVA JI BO AVAKIRINA SÛRIYEYA NÛ REFERANSEK E
Senator Savoldelli diyar kir ku hilweşîna rejîma Esad ji bo gelê Sûriyeyê hêviyekê temsîl dike û got: “Vê hêviyê di sala 2011’an de dest pê kir û niha lûtkeya şorekê ye ku encama nediyar e. Wek parçeyekî vê Şoreşê Kurdên Sûriyeyê ji deh salan zêdetir e piştgiriya projeyeke siyasî dikin ku xwe dispêre xweseriya demokratîk û hemû hemû civak bi hev re di nav aşîtiyê de dijîn. Îro ev model, ji bo avakirina Sûriyeya nû ya berfireh û demokratîk ku xwe dispêre edalet, wekhevî û mafê hemû pêkhateyan referansek e.”
HÊZÊN TARÎ GEFAN LI ROJAVA DIXWIN
Senator Savoldelli, têkoşîna Kurdan a li Sûriyeyê li dijî DAÎŞ’ê dayî bi bîra Wezîrê Karên Derve Jean-Noel Barrot xist û got: “Hêzên Kurd, bi taybet di sala 2015’an de di peywenda êrîşên cîhadîstan ên li ser xaka Fransayê li dijî gelê Fransî pêk anîn, ji bo Fransa û koalîsyonê di têkoşîna li dijî DAÎŞ’ê de bûye hevalbendekî biqîmet.
Lê belê, piştî ku di 8’ê Kanûna 2024’an de koma Îslamîst û tundrew Heyhet Tehrîr el-Şamê (HTŞ) li Şamê desthilat bi dest xist, bi taybet hin hêzên paşverû û tarî yên çekdar ku Tirkiye piştgiriya wan dike, li herêmên bakur û rojhilatê welat yên ku Kurd lê zêde ne li dijî Hêzên Sûriya Demokratîk (QSD) êrîş dane destpêkirin. Bi taybet li Dêrazor û Minbicê kontrola hin herêman bi dest xistin. Gelek şahidên ku ji herêmê hatine tînin ziman ku gelê sîvîl tê qetilkirin.”
NABE KU FRANSA KURDAN TENÊ BIHÊLE
Senator Savoldelli bang li Wezîrê Karên Derve Jean-Noel Barrot kir ku divê Fransa li hember êrîşên dewleta Tirk û komên çeteyan ên girêdayî wê yên li ser Rojava li aliyê Kurdan bisekine û wiha got: “Dema ku em mezinahiya êrîşên li dijî Kurdan li ber çavan bigirin, ez dixwazim bipirsim ku ‘Gelo, Fransa da ku piştgiriya hevalbendên xwe Kurdan û modela wan a rêveberiya demokratîk bike, di pêvajoya siyasî ya jinûveavakirina Sûriyeyê de rê li ber daxilbûna Kurdan veke û bi taybet ji bo şermezarkirina êrîşên biyaniyan ên ku parçebûn û rageşiyan dijwartir dikin ku ji ber Tirkiyeyê rû didin, dê giraniyeke çawa nîşan bide?’ Di vê serdemê de ku mirov nikare metirsiya karesateke nû ya însanî paşguh bike, Fransa nikare hevalbendên xwe yên Kurd tenê bihêle.”
