Siyasetmedarên Kurd anîn ziman ku rewşa nû ya li Sûriyeyê rû da yekîtî û yekparebûnê li Kurdan ferz dike û destnîşan kirin ku Kurd bi yekîtiyê dikarin êrîşên li ser Rojava bişikînin.
Serokê Giştî yê Partiya Azadî Ayettûlah Aşîtî û Şaredarê berê yê Xinûsê neviyê Şêx Seîd Hasan Basrî Firat li ser êrîşên li dijî destketiyên Kurdan ên li Rojava, siyaseta ji bo parastina van destketiyên Kurdan ji ANF’ê re axivîn.
Serokê Giştî yê Partiya Azadî Ayettûlah Aşîtî anî ziman ku firsendên li Sûriyeyê ji bo Kurdan hatine bidestxistin, derfeteke mezin ji bo sedsala pêş pêşkêş dike û got, “Eger stratejiyeke hevpar bê meşandin, gelê me yê li Sûriyeyê li gel hemû cihêrengî, bawerî û etnîkî dikare li hev kom bibe û bandorê li rewşa nû bike. Ev yekîtî jî wê firsendê bide Kurdan ku li qada navneteweyî bibin xwedî cihekî û nirxan bi dest bixin. Lê belê di nava şert û mercên vê demê de garantiya herî mezin hêzên leşkerî ne. Di halê hazir de Kurd li Sûriyeyê xwedî hêzeke leşkerî ne. Eger Kurdên li Sûriyeyê piştgiriyê bidin vê hêza leşkerî û li dora wê bibe yek hem li qada navneteweyî hem jî li Sûriyeyê wê karibin hebûna xwe hîn bi xurtî dewam bikin.
Ji bo Kurdan gelekî girîng e ku ders ji dîrokê bê wergirtin. Divê gelê Kurd şaşitiyên di dîrokê de hatine kirin bi her awayî binirxîne, dersê ji van şaşitiyan werbigirin û heman şaşitiyan dubare nekin. Mînak, di sedsala derbasbûyî de Kurd bi pey hesta biratiya olî ketin û şensê bûyîna dewletê ji dest dan. Di vê mijarê de gelek şîrove dikarin bêne kirin, lê belê bi kurtasî dikarim vê bibêjim: Siyaseta li ser biratiya olî tê meşandin, pêvajoya dewletbûna Kurdan asteng kir. Divê îro dest ji vê yekê bê derxistin, em nekevin nava heman şaşitiyê. Kurd divê bi neteweyên cîhanê re bê heman asta wekheviyê û li ser bingeha biratiya bi wan re bibin muxatab. Girîng e Kurd bi vê ferasetê tevbigerin.
Hin netewe xwedî dewletê ne, hinek jî dewleta xwe nîne. Di rewşeke bi vî rengî de biratiya ol ji bo niha nêzîkatiyeke rast nîne. Heta ku wekheviya rasteqîn neyê pêkanîn, biratî ava nabe. Piştî ku wekhevî pêk hat, biratî pêk tê. Pêşniyar û daxwaze me ew e ku Kurdên li Sûriyeyê di mijara dÎplomasî û yekîtiyê de zelal bin, li ser bingeha planên hevpar, stratejiya hevpar tevbigerin.”
BI RUHÊ BERXWEDANA KOBANÊ EM LI DORA DESTKETIYÊN ROJAVA BIBIN YEK
Hasan Basrî Firat jî ragihand ku bûyerên nû yên li Rojava bi yekîtiya gelê Kurd re wê veguherin destketiyeke mezin û bangeke bi vî rengî kir, “Li Rojava şerekî giran diqewime. Gelê me yê li wê derê 14 sal in li dijî DAÎŞ’ê û zaliman têdikoşe û destketiyên mezin bi dest xistiye. Ev destketî îro bi metirsiyeke mezin re rû bi rû ne. Dewleta Tirk bi rêya çeteyên xwe dixwaze vê derê hilweşîne û destketiyên me tine bike. Lê belê divê neyê jibîrkiin, ji bo gelê Kurd hêvî Rojava ye û destketiyên li wê derê ye.
Gelê me yê li Rojava ji bo xwerêvebirin û parastina ji zilma dewleta Tirk, dewletên Ereb û Fars rêveberiyek ava kirin, xweserî îlan kirin. Em neçar in xwedî li van destketiyan derkervin. Îro bi serkêşiya dewleta Tir zilm û şerekî mezin tê kirin. Mîna berxwedana li Kobanê li Rojava têkoşîneke ji neçarî dewam dike. Çawa ku gelê me li Kobanê bû yek û ev der kir keleheke berxwedanê, îro jî divê Kurd bi heman rengî li dora Rojava bicivin. Kurdistan bi çar parçeyan hatiye parçekirin. Ev rewş ne bi daxwaza me bû. Dijminên me, welatê me di nava Tirk, Eere bû Îraniyan de parçe kirin. Lê belê Kurdistan di dilê me de yek e.
Îro li Rojava bi saya fedakariya YPG û berxwedêrên din têkoşîneke girîng heye. Jin, ciwan û gelê me berdêlên giran dane. Niha jî dem hatiye ku em xweedî li bîranîna van lehengan derkevin ku li dijî dewleta Tirk û çeteyên wê jiyana xwe ji dest dan. Li kîjan devera cîhanê dibin bila bibin divê em piştgiriya madî û manewî pêşkêş bikin. Divê em li dora bîranîna van lehengan bicivin û destê alîkariyê dirêjî Rojava bikin.
Çawa ku bi ruhê berxwedana Kobanê em têkoşiyan, îro jî divê em bi heman biryardariyê destketiyên Rojava biparêzin. Parastina van destketiyan tê wateya bidestxistina statuya gelê me. Bêyî statuyê jî azadî nabe, ev yek jî tenê bi yekîtiyê dibe. Partiyên me, rêxistinên me divê li dora armanceke hevpar bibin yek. Tenê bi vî rengî em dikarin mafê xwe, statuya xwe bi dest bixin û bi ser bikevin.”
