Bi armanca şermezarkirina komploya navnetewî ya di 15 Sibatê de Kongra Star a Kantona Cizîrê bi dirûşmeya “Jin Jiyan Azadî li hemberî hemû komployan bi ser dikeve” meş û mîtîngek girseyî li bajarê Qamişlo lidar xistin.
Bi hezaran jin ji bajarên Hesekê, Dêrik, Girkê Legê, Tibespiyê, Çilaxa, Til Hemîs, Ebû Cirin, Amûdê, Hedadiyê, Şedadê, Ebdan, Til Temir, Mergede, Serêkaniyê, Dirbêsiyê, Zirgan, bajarokên Til Koçer û Til Birak berê xwe dan Qamişlo û tevlî meşê bûn.
Meş li pêşiya çerxerêya Sîvan a bajarê Qamişlo bi dirûşmeyên “Na Ji Komplo re”, “Bê Serok Jiyan Nabe”, “Jin Jiyan Azadî” destpê kir. Di meşê de wêneyên Rêber Apo û alên Kongra Star hatin hildan.
Jin heta Stadyuma Heysem Kiço meşiyan û li vir meş veguherî mitîngek mezin. Piştre jinan ji bo giyanê şehîdan deqeyek rêz girtin.
Berdevka Kongra Star Rîhan Loqo axivî û got: “Rêber Apo ji bo parastina mafê jin gelek ked û têkoşîn da meşandin. Her wiha em li beramberî vê yekê pêwîste xwedî derkevin û Rêberê xwe ji nav çar dîwaran derxînin. Em bi felsefeya Rêber Apo ya ku me kir xwedî nasname, têkoşîn dikin. Dema ev komplo li ser kesayetê Rêber Apo pêk anîn xwestin bi vê yekê îradeya gelê Kurd bi giştî bişkînin. Em ê vê salê ji roja reş wergerînin roja kêfxweşî û azadiyê.”
Piştre jî bi navê Yekîtiya Jinên Suryanan Stêra Mûrad da zanîn ku ew bi fikir û felsefeya Rêber Apo gihiştin vê asta bilind a serketinê û wiha got: “Em wek jinên Sûriyan di Sûriyeyê de bê maf bûn lê bi hatina Rêber Apo em her kes bi hev re bûn xwişk-bira û jin ji her alî ve bûn xwedî maf. Her wiha ji ber vê yekê dewletên komploger ev komplo li hemberî Rêber Apo pêk anîn, ji bo ku her kesê bê maf û bindest bihêlin. Di dawî de em dibêjin ku em ê jin bi yek destî Rêberê xwe rizgar bikin.”
Di heman çarçoveyê de Koordînsayona Meclisa Jinan Semer Abdullah da zanîn ku di nav vê şoreşê de gelek destkeftî bi saya Rêber Apo hatin hatin bidestxistin û wiha pêde çû: “Em wek jin ji her alî deyndarê Rêberê xwe ne, ji ber wê jî pêwste em Rêberê xwe rizgar bikin. Rêber Apo ji bo ku gelan azad bike jiyana xwe feda kir em ê jî jiyana xwe ji bo azadiya Rêberê xwe feda bikin. Pêwîste êdî ev sal bibe sala dawî ji komployê re û Rêberê me di nav me de azad bibe.”
Endama Koordinasyona Yekitiya Jinên Ermenî Anahit Kasabiyan diyar kir ku jiyana wan li ser fikr û felsefeya Rêber Apo dimeşe û got, “Em ê heta dawî têbikoşin da ku Rêber Apo ji zindanê derxînin. Ji ber ku bi saya Rêber Apo hemû netew bûn yek û ferqa wan ji hev nema.”
Bi vê yekê jinan soza têkoşîna ji bo azadiya Rêber Apo da û mitîng bi tilîlî û dirûşmeyên jinan bi dawî bû.
