Xizmên windayan û Komaleya Mafên Mirovan(ÎHD), ji bo dîtina windayan û darizandina kiryaran îro li sê navendan çalakiyên xwe domandin.
AMED
Şaxa Amedê ya Komaleya Mafên Mirovan (ÎHD) û malbatên windayan di hefteya 836’emîn a çalakiya xwe de ku bi şîara “Bila winda bên dîtin û kiryar bên darizandin” lidar dixin, hatin ba hev.
Girse li pêşiya Abîdeya Mafê Mirovan a li Parka Koşuyoluyê ya li navçeya Amedê Rezanê kom bû û wêneyên windayan hilgirtin. Di çalakiya vê hefteyê de aqûbeta Mehmet Mehdî Akdenîz hat pirsîn ku di 20’ê Sibata 1994’an de li Pasûrê hat windakirin.
Daxuyanî bi çalakiya rûniştinê bi dawî bû.
ÊLIH
Li Êlihê ÎHD û xizmên windayan di hefteya 672’emîn a çalakiyên xwe de li pêşiya Abîdeya Mafê Mirovan a li ser Cadeya Gulîstanê hatin ba hev. Di çalakiyê de pankarta “Bila winda bên dîtin û kiryar bên darizandin” hat vekirin û wêneyên windayan hatin hilgirtin. Di çalakiya vê hefteyê de aqûbeta Cuneyt Aydinlar hat pirsîn ku di 20’ê Dibata 1994’an de li navçeya Stenbolê Bakirkoyê di bin çavan de hat windakirin.
Daxuyanî bi çalakiya rûniştinê bi dawî bû.
ÎZMÎR
Şaxa ÎHD’ê ya Îzmîrê, çalakiya bi şîara “Bila winda bên dîtin û kiryar bên darizandin” ku du hefteyan carekê lidar dixin, li navçeya Konakê li pêşiya Sumerbanka berê li hev kom bûn. Gelek kes beşdarî çalakiyê bûn û di çalakiyê de pankartên “Winda meseleya wijdanê ne, xwedî li wijdana xwe derkeve” û “Kiryar diyar in, winda li ku ne” hatin vekirin. Di çalakiya vê hefteyê de aqûbeta Murat Yildiz (19) hat pirsîn ku 23’ê Sibata 1995’an de li Şaxa Asayîşê ya Ozkanlarê ya li navçeya Îzmîr Bornavayê piştî îfadeya xwe da hat windakirin.
Daxuyanî bi çalakiya rûniştinê bi dawî bû.
