Navenda Ragihandinê ya Hêzên Sûriyeya Demokratîk (QSD) li ser şer daxuyaniyek da. Daxuyanî bi vî rengî ye:
“Dewleta Tirk a dagirker û çeteyên wê ku nikarîn li eniyên şer li hemberî hêzên me pêşketinan pêk bînin, her timî ji bo rakirina tola binkeftina xwe ya li meydanî, êrişî gund û bajarên tijî sivîl dike.
Di vê çarçoveyê de dewleta Tirk a dagirker duh (Şemiyê) herêma navbera gundên Qumç û Berxbotanê yên başûrê Kobanê de bombebaran kir û komkujiyeke mezin li dijî malbatekê pêk anî. Di encama vê komkujiyê de di nav de 7 zarok û jinek 9 sivîl şehîd bûn û 2 jî birîndar bûn.
Eniya Bendava Tişrînê; balafirên şer ên dewleta Tirk a dagirker êrişên xwe yên giran li derdora bendavê û gundewrê wê dewam kirin. Li dijî cihên karkeran ên girêdayî bendavê jî êriş pêk anîn. Şeva Şemiyê/Yekşemê heya saetên derengiya rojê tevahiya gundewarê bendavê bi obîsan topbaran kirin. Di encamê de zerarên mezin li gund û malên sivîlan bûn.
Eniya Qereqozaxê, balafirên şer ên dewleta Tirk a dagirker gundên Xeseq û girê Sêvê yên derdora bendavê bombebaran kirin. Gundê Bîr Hiso û girê Sêvê jî bi balafirên bê mirov ên bi çek hatin hedefkirin. Her wiha derdora pirê û gundewarê wê, gundên Tîna, Cada, Bîro Hiso, Xeseq, Dîkan, Melha, Sinaa û xaçerêya Sirînê bi zêdetirî 80 guleyên obîs, tank, roket û hawnan hatin topbaran irin. Ji ber êrişên hewayî û bejahî zerarên mezin gihîştin mal û milkên şêniyan.”
