Li navçeya Xelfetî ya Rihayê, di roja duyemîn de di çarçoveya Festîvala 4’ê Nîsanê de ber bi gundê Amarayê ve meşek hate lidarxistin.
Girseya gel serê sibehê li Parka 4’ê Nîsanê li hev kom bû û ji vê derê bi pêşengiya Tevgera Jinên Azad (TJA) meşiya.
Parlamenterên Partiya Herêman a Demokratîk (DBP), Partiya Demokrasî û Wekheviyê ya Gelan (DEM Partî), Hevşaredarên DEM Partiyê, endmên Meclîsa Dayikên Aştiyê û meşvanên Amarayê tevlî meşê bûn.
Di meşê de wêneyên Mûstafa Dag û Mahsûm Karaoglan hate hildan ku sala 2009’an li Amarayê di meşa ‘Rêwîtiya Rojê’ de hatin qetilkirin.
Di meşê de ku jinan pêşengî jê re kirin, pankarta bi nivîsa ‘Hezar silav ji roja me ya ji Amarayê hilat’ hate hildan.
Girseya gel bi dirûşman rojbûna Rêber Apo pîroz kir.
Di destê Dayikên Aştiyê de jî şaxê zeytûnê hebû. Meş li derveyî navçeyê bi dawî bû û gel li vê derê li ber stranên Kurdî govend gerand.
Aktîvîsta TJA’yê Fatma Ablay li vir axivî û anî ziman ku 4’ê Nîsanê ji bo gelê Kurd rojeke girîng e.
Fatma Ablay diyar kir ku daxwaza jin û gelê Kurd zelal e, divê dewlet gavê biavêje û got, “8’ê Adarê, Newrozê û îro li vê derê gel îradeya xwe nîşan da. Ev îrade îradeya jinê ye. Divê Enqere vê îradeyê nas bike û tavilê gavê biavêje. 4 roj in ciwanan berê xwe dane rojê. Divê azadiya fîzîkî ya Rêberê Gelê Kurd Abdullah Ocalan tavilê pêk were.”
Piştî axaftinan heyetekê berê xwe da Amarayê.
