Tê zanîn ku TPAO’yê beriya niha jî li herêmên ku lê petrol tune ne, zirarên mezin dabûn xwezayê û talan pêk anîbûn. Li gundê Beşparmak ê navçeya Bêgirî ya Wanê bûyereke heman rengî rû da.
Qada şantîyeyê ya li rex gundî hatiye avakirin, weke herêma ewlehiya leşkerî hatiye îlankirin. Li herêmê ji bo leşkeran nuxte hatine avakirin û destûr nayê dayîn ku gundî li nêzî herêma berbehs bibin.
Di çarçoveya vê yekê de ku bêyî agahî û destûra gundiyan pêk hatiye, rêyên gundiyan û çûnûhatina wan a ji bo zozanan hatine astengkirin.
Ji bo vê yekê tu pere ji gundiyan re nehatiye dayîn û rayedarên dewletê jî bi gotina ku ‘’çavkaniyên binerd aîdî dewletê ne’’ hewl didin desteserkirina berbehs rewa bikin. Welatiyên herêmê vê bûyerê weke ‘’desteserkirin û talana xwezeyê’’ pênase dikin.
