Daxuyanî bi tevlîbûna mamoste, şagirtên dibistanan û yên Zanîngeha Kobaniyê li Qada Şehîd Egîd a Kobanê ji aliyê endamê komîteya amadekar Saziya Zimanê Kurdî (SZK) ya Kantona Firatê Mazlûm Cimo ve hat xwandin.
Di destpêka daxuyaniyê de hate gotin: “Bi boneya rasthatina Roja Zimanê Kurdî (15’ê Gulanê) em vê rojê li hemû şehîd, têkoşer, xebatkar, Kurd û hemû azadîxwazên doza Kurdistanê pîroz dikin.
Li ser daxuyaniya fermî ya ji bo Roja Zimanê Kurdî ku ji aliyê Saziya Zimanê Kurdî (SZK) ve hatiye weşandin, em wek qada perwerdeyê ya herêma Firatê piştgiriyê didin wê daxuyaniyê û tekeziya xwe ji bo têkoşîna zimanê kurdî tînin ziman.”
Hate diyarkirin ku divê zimanê kurdî bi fermî ji hêla destûra nû ya Sûriyeyê ve were naskirin û hate gotin: “Ji bo ku ev deskeftiyên me yên şoreşê di asteke herî bilindtir ên zanistî û akademîk ve werin pêşxistin, divê mamoste, rewşenbîr, xwendevan û hemû xebatkarên kurdî xwe di ber pêşxistina zimanê kurdî de berpirsyar bibînin.”
Di dawiyê de jî hate gotin: “Li ser van bingehan em jî wek komîteya amadekar a saziyên perwerdeyê yên herêma Firatê, dest bi rêzeçalakiyên Roja Zimanê Kurdî dikin û em jî bang li civaka xwe dikin; ka werin em bi hev re vê rojê pîroz bikin. Bijî zimanê kurdî û cejna zimanê kurdî pîroz be.”
