Biryarên 12’emîn Kongreya PKK’ê li gel raya giştî hatin parvekirin. Di nava biryaran de biryarên weke bidawîkirina têkoşîna çekdarî û fesxkirinê jî cih girtin ku ev biryar di nava raya giştî a Tirkiyeyê û cîhanê de bûn sedema nîqaşên dijwar.
Serokê Giştî yê Partiya Karkeran a Tirkiyeyê (TÎP) Erkan Baş têkildarî daxuyaniya PKK’ê banga wê ya ji sosyalîstan re ji ANF’ê re axivî.
LI GEL BIRYARÊ ARGÛMANÊN KU DI ÊRÎŞÊN FAŞÎSTE DE DIHATIN BIKARANÎN JI HOLÊ RABÛN
Erkan Baş di destpêka axaftina xwe de diyar kir li gel vê biryarê argûmanên ku bi salan e desthilatdarî weke hinceta êrîşan bi kar tîne, ji holê rabûn û got: ‘’Em hemû geşedan û pêngavên têkildarî bêdengbûna çekan û dabînkirina aşitiyê gelekî erênî û girîng dibînin. Ji bo me ya girîng pêkhatina aşitiya ya li sernserê herêmê ye. Li gel biryarên hatine ragihandin argûmanên ku desthilatdarî bi salan e weke hinceta hemû kiryarên nedemokratîk, zextkar û faşîzan bi kar tîne bi awayekî fermî ji holê rabûn ku ev yek jî bi tena serê xwe geşedaneke gelekî girîng e.’’
EM Ê LI DIJÎ HEMÛ ARGÛMANÊN KU GELÊ KURD HEDEF DIGIRIN BISEKININ
Baş piŞtre destnîşan kir ku ew bûyerê weke meseleyeke bazar û danûstandinê nabînin û diyar kir ku divê hêviya aşitiyê were misogerkirin û ev yek anîn ziman: ‘’Di vê qonaxê de em vê meseleyê weke ‘bazar’ û ‘danûstandinekê’’ pênase nakin û dixwazim diyar bikim ku ji bo misogerkirina hêviya aşitiyê divê hemû beşên civakê û aktorên siyasî erk û berpirsiyariyên xwe bi cih bînin. Çawa ku nabe bazara aşitiyê were kirin di heman demê de demokrasî, azadî û mafên mirovan jî ne mijarên danûstandinê ne. Weke me hemû caran piştgiriya aşitiyê kiriye, em îro jî piştgiriyê didin aşitiyê û li hemberî emperyalîst, faşîst û destilatdariya patronan disekinin. Ji bo welatekî aşitiyê û ji bo bidestxistina azadî û demokrasiyê divê hemû gel bi hev re têbikoşin. Ji bo bidawîbûna şer û pevçûnên li herêmê, pûçkirina planên hêzên emperyalîst û hevkarên wan û têkbirina hemû kiryarên entîdemokratîk ên li dijî gelê Kurd divê em zêdetir li ber xwe bidin.’’
EM Ê RÊHEVALTIYA TÊKOŞÎNA AZADIYA GELÊ KURD BIKIN
Baş di dewama axaftina xwe de anî ziman ku ew ê piştgiriyê bidin têkoşîna azadiya gelê Kurd û got: ‘’Em bi bangê dest pê bikin; bi min ez dikarim li ser navê hemû tevgerên şoreşger ên li Tirkiyeyê bersivekê bidim. Gotinên Denîz Gezmîş û hevalên wî yên herî dawiyê bi qasî manîfestoyekê weke pisûlayekê jî ne. Dîroka welatê me, bi mînakên parastina yekîtî û xwişk-biratiya gelên Kurd û Tirk a di têkoşîna şoreş û sosyalîzmê de tije ye. Weke heya roja îroyîn bila ji niha û pê ve jî gumanên tu kesî nebin ku wê sosyalîst piştgiriyê bidin têkoşîna maf û azadiya gelê Kurd.’’
JI BO HER KESÎ TEKANE RÊYA EDALETÊ SOSYALÎZM E
Baş di dawiya axaftina xwe de bal kişand ser sosyalîzma ku di daxuyaniya PKK’ê de cih digire û ev yek anîn ziman: ‘’Em dikarin têgeha têkildarî sosyalîzmê a di daxuyaniyê de cih digire ji du aliyan ve binirxînin. Ya yekem wateya ku sosyalîzm tekane rê ye ku li vî welatî û Rojhilata Navîn aramiya mayînde û rastîn pêk bîne û ji bo her kesî azadî û edaletê dabîn bike. Ya duyem jî beyana îradeyê ya li hemberî pergala emperyalîst û kapîtalîst e.’’
