Civîna dema navberê ya Desteya Rêveberiyên Xwecihî ya Demokratîk a Partiya Demokrasî û Wekheviyê ya Gelan (DEM Partî) li Navenda Kongreyê ya Çand Amedê destpê kir û wê 2 rojan dewam bike. Hevseroka Giştî ya DEM Partiyê Tulay Hatîmogûllari û Hevseroka Giştî ya Partiya Herêman a Demokratîk (DBP) Çîgdem Kiliçgun Ûçar jî beşdarî civîna Jinê ya Rêveberiyên Xwecihî ya Demokratîk bûn.
BÛCAK: JIN PÊŞENGÊN AVAKIRINÊ NE
Di destpêka civînê de Hevşaredara Bajarê Mezin a Amedê Serra Bûcak axivî û anî ziman ku jin pêşengên avakirina civaka demokratîk in û got, “ji ber vê yekê di her xizmetê de em karê xwe bi vê perspektîfê dimeşînin. Em jin, bi hêsanî negihîştin vê astê. Hemû hevrêyên xwe yên jin ên ji bo van rojan berdêl dan, canê xwe ji dest dan û yên li girtîgehan e bi bîr tînin.”
HATÎMOGÛLLARI: BILA QANÛNA QEYÛM BETAL BIBE
Hevseroka Giştî ya DEM Partiyê Tulay Hatîmogûllari jî anî ziman ku wê pratîka xwe ya şaredariyê ya salekê nîqaş bikin û got, “Jin, jiyan e, jiyan rêvebirina xwe bi xwe ye.”
Hatîmogûllari anî ziman ku bi feraseta şaredariyê ya azadîparêziya jinê, ew hewl didin pratîkeke parastina hemû zindiyan bixin meriyetê û bal kişand ser qeyûmên li şaredariyan têne tayînkirin. Hatîmogûllari got, “Bi vê ferasetê hewl tê dayin ku mafê hilbijartinê yê gelê Kurd jê bistîne û derbê li temsîliyeta jinê, li hevserokatiyê, li temsîliyeta wekhev bixin. Lê belê li hemberî her gava tayînkirina qeyûm me paşve gav neavêt. Di nava gel de me karê xwe dewma kir. Di her hilbiajrtinê de me hêza xwe hîn xurt kir û li gel zextê jî em bi pêş ve çûn. Em ji vê derê careke din bang li vî mejiyê qeyûm dikin. Di vê demê de ku axaftin li ser pêvajoya civaka demokratîk û aştiyê tê kirin, divê ev feraseta qeyûm, rejîma zordar êdî bi dawî bibe. Yek ji gavên bingehîn ên îro bê avêtin, betalkirina qanûna qeyûm e, vekişandina qeyûmên tayînkirî ye. Bila biçin walîtiyê, qeymeqamtiyê bikin, bila hevşaredar bên ser wezîfeya xwe. Ev yek mafê herî xwezayî yê vê civakê ye.”
BANGA RÊBER APO
Tulay Hatîmogûllari ‘Banga Aştî û Civaka Demokratîk’ a Rêber Apo jî nrixand û got, “Di mijara gavên ji bo demokratîkbûna civakê de bêguman gelek tişt hene ku divê bêne kirin. Em bi wezîfe û berpirsyariyên ji feraseta aştî û demokrasiyê rû bi rû ne. Civaka demokratîk tê wateya jiyaneke bi rengekî wehhev û azad a gelan. Bajarên me bibin dost û m alên gelan. Bêyî cudahiya ol, ziman, nijad û zayend hemû cihêrengî bibin hêmanên bingehîn. Bi qasî ronîkirina kolanan divê dil û mejî jî ronî bin. Divê jinên xwe azad û wekhev be, xizmetên xwe li gorî zayendiya civakî be, xizmet bi zimanê dayikê be, tundiya li dijî jinê, xwezayê, zarokan û astengdaran bi dawî bibe. Ji bo vê jî pêwîstî bi karekî bi rêk û pêk heye.”
Hatîmogûllari diyar kir ku bêguman berpiryarî û wezîfeyên gelekî girîng dikevin ser milê parlamentê jî û got, “Ya destpêkê jî amadekirina qanûnek ji bo betalkirina qeyûman e. Li gel vê yekê xurtkirina rêveberiyên xwecihî ye. Rêya ber bi civaka demokratîk ev e. Em di wê baweriyê de ne ku demokrasî wê li vî welatî ava bibe. Wê wekheviya jin û mêr, azadiya jinê li vê xakê şîn bibe.”
Civînê li çapemeniyê girtî dewam kir.
