Xizmên Windayan û Şaxên ÎHD’ê yên Amed, Êlih û Colemêrgê vê hefteyê jî çalakiya xwe ya “Bila winda bên dîtin kujer bên darizandin” ku her hefte lidar dixin domandin. Di çalakiyên vê hefteyê de aqûbeta Îbrahîm Gundem û Hecî Atalay hate pirsîn û hate xwestin ku kujerên Saît Akin bên darizandin. Di çalakiya li Colemêrgê de nivîskar, rojnamevan û zanayê Kurd Mûsa Anter ku di 20’ê Îlona 1992’yan de ji aliyê JÎTEM’ê ve hatibû kuştin hate bîbîranîn.
AMED
Xizmên Windayan û rêveberên Şaxa ÎHD’ê ya Amedê çalakiya xwe ya “Bila winda bên dîtin kujer bên darizandin” di hefteya 919’emîn de li ber Bîrdariya Mafê Jiyanê ya Parka Koşûyolû ya navçeya Rezan a Amedê lidar xistin. Parazvanên mafên mirovan, endam û rêveberên saziyên sivîl ên civakî û xizmên windayan beşdarî çalakiyê bûn. Di çalakiyê de wêneyên kesên hatine windakirin hatin hilgirtin.
ÎHD’ê û xizmên windayan di çalakiya vê hefteyê de aqûbeta Îbrahîm Gundem ê di 25’ê Îlona 1991’an li gundê Qenderhel ê Hezroyê hatiye windakirin pirsîn.
Endamê Komîsyona Windayan a ÎHD’ê Firat Akdenîz di destpêka çalakiya vê hefteyê de axivî û wiha got: “Tu deman em şopa kesên hatine windakirin bernadin. Her çiqas piştî dehan salan em bizanibin ku êdî windayên me jiyan nakin jî em li pey hestiyên wan in. Hefteya borî ji bo cangoriyan bîranîn hatin lidarxistin û ev şîn û bîranîn kêm e. Ji ber ku van dayîkan cenazeyên zarokên xwe nedîtine û nekarîne şîna xwe bikin êşa wan jî kêm nabe. Divê cenazeyê her kesê ku hatiye kuştin û windakirin malbat bikaribe bistîne da ku êşa wan kêm bibe.”
Piştî axaftina Firat Akdenîz, xwişka Îbrahîm Gundem Ferîde Gundem bi bîr xist ku birayê wê ji aliyê leşkeran ve ji malê hatiye derxistin û wiha axivî: “Birayên min li ber çavên min birin û kesên ku ew birine leşker bûn. Ji wan kesan yek jî leşkerê bi navê Kenan Şahîn bû. Em îro dixwazin ev kes û kesên berpirsyar werin darizandin.”
Parlementerê Yenî Partiyê yê Amedê Sezgîn Tanrikûlû jî diyar kir ku divê şerê bi dehan salan didome êdî bi aştiyek mayînde bi dawî bibe û wiha got: “Em di pêvajoyek gelekî girîng re derbas dibin û em hewl didin şerê bi dehan salan bi aştiyek mayînde bi dawî bibe. Heya ku heqîqeta windayan dernekeve holê û edalet neyê van qadên em şînê lê digirin aştiya mayînde pêk nayê. Bi taybetî xala 7’emîn a çarçove qanûnê qala edaletê dike û divê edalet ji bo herkesî pêk were.”
Endamê Şaxa ÎHD’ê ya Amedê Bawer Çîndemîr çîroka windakirina Îbrahîm Gundem xwend û piştî xwendina çîroka windakirina Îbrahîm Gundem daxuyanî bi çalakiya rûniştinê bi dawî bû.
ÊLIH
Xizmên Windayan û rêveberên Şaxa Komeleya Mafên Mirovan (ÎHD) a Êlihê di hefteya 755’emîn de çalakiya xwe ya “Bila winda bên dîtin û kujer bên darizandin” li ber Bîrdariya Mafên Mirovan a li ser Cadeya Gulistanê lidar xistin. Di çalakiyê de rêveber û endamên ÎHD’ê û Xizmên Windayan û gelek kes beşdar bûn û wêneyên kesên ku di bin çavan de hatine kuştin û windakirin hatin hildan. Di çalakiya vê hefteyê de li aqûbeta Hecî Atalayê ku di 10’ê Îlona 1996’an de ji navçeya Pîranê ya Amadê ku dema baxçeyê xwe av dida ji aliyê Miduriyeta Ewlehiya navçeya Pîranê ve hatibû revandin û ji wê rojê ve tu agahî jê nayê girtin hate pirsîn. Endamê ÎHD’a Êlihê Huseyîn Elçî çîroka Hecî Atalay xwend.
Daxuyanî bi deqîqeyek çalakiya rûniştinê bi dawî bû.
COLEMÊRG
Şaxa Komeleya Mafên Mirovan (ÎHD) a Colemêrgê û Xizmên Windayan jî çalakiya xwe ya “Bila winda bên dîtin, kujer bên darizandin” di hefteya 245’an de li Kolana Hunerê ya Geverê lidar xist. Di çalakiya vê hefteyê de aqûbeta Saît Akin ê di 25’ê Îlona 1995’an de li gundê Befircan a navçeya Geverê hatibû binçav kirin û kuştin hate pirsîn. Daxuyanî ji aliyê Hevserokê Şaxa ÎHD’ê yê Colemêrgê Ozan Akbaş ve hate xwendin. Di daxuyaniyê de hat ragihandin ku ev 30 sal e kujerên Saît Akin nehatine darizandin.
Di heman daxuyaniyê de nivîskar, rojnamevan û zanayê Kurd Mûsa Anter ku di 20’ê Îlona 1992’yan de ji aliyê JÎTEM’ê ve hatibû kuştin hate bîbîranîn.
Daxuyanî bi çalakiya rûniştinê bi dawî bû.
