Şaxa Komeleya Mafên Mirovan (ÎHD) a Colemêrgê îro 12’emîn Kongreya Asayî li dar xist. Kongre, li Baroya Colemêrgê hat lidarxistin. Nûnerên partiyên siyasî, rêxistinên civaka sivîl û Meclisa Dayikên Aştiyê tevlî bûn. Di kongreyê de pankarat “Azadî ji girtiyên nexweş re” û “Nabe ku mafê tedawiyê bê astengkirin” hatin daliqandin. Di kongreyê de peyama Hevseroka Kongreya Civaka Demokratîk (KCD) Leyla Guven ku li Girtîgeha Sîncanê tê ragirtin hate xwendin.
‘DIVÊ DEWLET BI BERDANA GIRTIYÊN NEXWEŞ JIDILBÛNA XWE NÎŞAN BIDE’
Leyla Guven, di peyama xwe de wiha got: “Gelê Colemêrgê ku ez weke îradeya xwe hilbijart û şande Meclisê û bi têkoşîna xwe her kes kiriye heyrana xwe, bêguman ji bo vê gelek bedel da û dide. Hêj niha jî hevşaredar û wekîlên di demên berê de hilbijartî girtî ne, hin jê li sirgunê ne. Zarokên wan an di zindanan de ne an jî canê xwe ji dest dane. Tevî van bedelên giran jî heta niha tu caran ji sekna xwe ya serbilind tawîz neda û gelê me êdî jiyaneke aram, jiyaneke însanî heq dike. Êdî dema wê ye ku em hêsirên ji bo aştiyê tên rijandin, veguherînin hêsirên keyfxweşiyê. Firsendeke dîrokî derket pêşiya me û birêz Ocalan di vê mijarê de rêyeke girîng vekir. Di serî de berdana girtiyên nexweş, divê dewlet jidilbûna xwe bi gavên diavêje nîşan bide ku fikarên di serê gel de ji holê rabin. Dikare ji bo tevahiya gelên li Tirkiyeyê pêkvejiyaneke wekhev, birûmet û adilane ava bike. Dikare zimanê cihêkariyê û rageşiya heta niha bi dawî bike. Ev jî bi wê dibe ku demokrasiyê ji bo hemû kesî cîbicî bike. Em dikarin bi hev re komareke demokratîk ava bikin. Bila şert û mercên vê ava bikin û astengiyên li pêşiya siyaseta demokratîk a Kurdan rakin. Silav ji kesên bo aştiyê canê xwe feda krine, yên bi vê hêviyê bêhnê distînin, yên dilê wan ji bo aştiyê lê didin, silav ji ciwanan re û kesên emrê xwe fedayî vê têkoşînê kirine. Berxwedan jiyan e! Jiyana bi rûmet nêzik e.”
‘DIVÊ DEWLET BERPIRSYARTIYÊN XWE BICIH BÎNE’
Hevseroka Şaxa ÎHD’a Colemêrgê Sîbel Çapraz jî diyar kir ku israra di neçareserkirina pirsgirêka Kurd de, polîtîkayên ewlehiyê zêde dike û got: “Ev rewş di nava gelê Kurd de rê li ber birînan vedike û dibin sedema binpêkirinên mezin. Em, biryarên kongreya PKK’ê biqîmet û girîng dibînin. Lewma jî avêtina gavên jidil û avakirina têkiliyên baweriyê, dê di destpêka vê sedsalê de bibin hewldana aştiya mezin. Em bang li dewletê dikin ku berpirsyartiyên xwe yên têkildarî pêvajoya nû bicih bîne.”
PARLAK: KONGREYA PKK’Ê FIRSENDEKE DÎROKÎ YE
Wekîlê DEM Partiyê yê Colemêrgê Vezîr Coşkun Parlak jî got ku kongreya PKK’ê firsendekî mezin e û ew ê berpirsyartiyê li xwe bigirin û vê firsenda dîrokî ji dest nedin.
Di kongreyê de hilbijartin hate kirin û Sîbel Çapraz û Ozan Akbaş weke Hevserokên Şaxa ÎHD’a Colemêrgê hatin hilbijartin.
