Ji Rojhilatê Kurdistanê û Îranê 7 partiyên siyasî û rêxistinan belavokeke hevpar weşandin û li ber zextên desthilata Îranê ya li hemberî girtiyên siyasî, muxalîf û civaka sivîl rabûn.
Daxuyaniya hevbeş a partiyên li Rojhilatê Kurdistanê ya li ser pêla nû ya zext û binçavkirinê ya li Îranê û Rojhilatê Kurdistanê bi vî rengî ye:
“Piştî şerê 12 rojî yê navbera Îran û Îsraîlê û ragihandina agirbestê, pêlek nû û berfireh a zext tepisandinê bi rêya girtin, çavsorî, dadgehiyên neadîlane û îdamên bi lez li Kurdistanê û deverên din ên Îranê ji aliyê Komara Îslamî ve destpê kiriye. Dezgehên ewlehiyê yên rejîmê bi rêya tometên nerewa, çêkirina dosyayên sexte û darizandina girtiyên siyasî û her wiha bi nirxandina yasaya sîxuriyê li parlament û dezgeha dadweriya rejîmê rewşek metirsîdar ji bo girtiyên siyasî û rexnegirên hikumetê afirandine. Li gorî raporan, hejmara destbiserkiriyan heta niha ji hezar kesî derbas bûye û rêjeya darvekirina girtiyên siyasî zêde û berdewam dike.
Çend roj berî niha bû ku Îdrîs Alî, Azad Şucaî û Resûl Ehmed, sê kolberên Kurd ku bi tometa hevkariya bi Îsraîlê re hatibûn tometbarkirin, hatin darvekirin û niha jiyana çend girtiyên din ên Kurd ji Bokanê ku sê salan berî niha li şoreşa Jîna’yê de hatibûn girtin û cezayê îdamê bi ser wan de hatiye sepandin, di metirsiyê de ye.
KOMARA ÎSLAMÎ YA ÎRANÊ DIXWAZE TOLA ŞERÊ XWE YÊ BI ÎSRAÎLÊ RE JI CIVAKÊ HILÎNE
Komara Îslamî ya Îranê her gava di şerekî yan pirsekî navdewletî de tûşî şikestê hatibe, heyf û tola xwe ji tevgera mafxwaziya xelkê di hundurê welêt de standiye û niha jî dixwaze tola xwe di şerê Îsraîlê de ji civaka sivîl, tevgera mafxwaziya gelên Îranê û girtiên bêberevan bistîne. Bê guman, eger Komara Îslamî hest bi givaş û bertekên bi hêz ên navxweyî û derekî neke, dûr nîne trajediya komkujiya girtiyên siyasî di girtîgehên Îranê de dubare bibe, wekî ew a ku di sala 1988’an de piştî pejirandina agirbesta bi Iraqê piştî 8 salan şerê bêencam, bi hezaran girtiyên siyasî di welat de kuştin.
Em tevî nîşandana nîgeraniyên xwe li dor wan metirsiyên ku gefê ji çalakvanên siyasî û sivîl, bi taybetî jiyana girtiyên siyasî dixwen, daxwaz ji:
– Birêz ‘’May Sato’’ raportorê taybet ê Neteweyên Yekbûyî ji bo karûbarên mirovî li Îranê
– Navendên navneteweyî ên Berevnakar ên mafên mirovan
– Hemû xelkê azadîxwaz ên cîhanê dikin;
BANGA LI SAZIYÊN NAVNETEWEYÎ Û CIVAKA AZADÎXWAZ
Bi her awayî ku dikarin dengê xwe li dijî vê siyaseta nemirovane bilind bikin û rê nedin ku Komara Îslamî bê tirs û xem ber bibe canê wan xebatkarên ku ji bilî mafxwazî, azadîxwazî û xebat ji bo başkirina rewşa jiyana xwe û mafên siyasî, sivîl û neteweyî ên xwe ti gunehek nebûne.
Em bang li partî û rêxistinên siyasî yên Îranê, saziyan, Îraniyên azadîxwaz û Kurdên diyasporayê dikin ku bi hevdengî, çalakî û aksiyon û civînên xwe, dengê nerazîbûn û bêzariya xwe li dijî vê siyaseta tepeserkar bilind bikin. Bêguman hesta hevsozî û piştgiriya ji bo girtiyên siyasî di nav civatên xelkê Îranê de pir bi hêz û xurt e û ev nerazîbûna giştî û tevalî ya cîhanî wê ji bo tevgerek seranserî û Kurdistanî li paşerojê de xweş û geş bike.”
Partiyên ku mohra xwe danîne binê daxuyaniya hevpar:
Partiya Jiyana Azad a Kurdistanê- PJAK
Partiya Azadiya Kurdistanê – PAK
Partiya Demokrat a Kurdistana Îranê (PDKÎ)
Komeleya Şoreşger a Zehmetkeşên Kurdistana Îranê
Sazmana Xebat ya Kurdistana Îranê
Komeleya Zehmetkeşên Kurdistanê
Komele- Rêxistina Kurdistanê ya Partiya Kumonîst a Îranê
