Demeke kurt beriya meclîs bikeve betlaneyê Serokê Meclîsê Nûman Kûrtûlmûş bi serokwekîlên komên partiyên li meclîsê re li hev kom bû û komîsyona li meclîsê bê avakirin nirxand. Lê belê ji ber ku meclîs kete betlaneyê li ser sererastkirinên qanûnî û paşeroja komîsyonê vê gavê çarçoveyeke şênber nîne.
Partiya Kedê (EMEP) li meclîsê du parlamenterên xwe hene, lê koma xwe nîne. Yek ji wan parlamenteran jî Îskender Bayhan ê wekîlê Stenbolê ye. Îskender Bayhan li ser karên komîsyonê ji ANF’ê re axivî.
Bayhan diyar kir ku hemû partiyan li ser komîsyonên nêrînên xwe yên cuda anîn ziman, nêrîna wan jî ji ya bloka desthilatdariyê cuda ye û got, “Têkildarî kar û rola komîsyonê nêzîkatiyên me ji aliyê esasî ve cuda ne. Nêzîkatiyên CHP, DEM Partî, Yenî Yol, TÎP’ê jî yên ku tê payin di nava komîsyonê de cih bigirin, cuda ne. Lewma em hewl didin nehêlin ku komîsyon bibe parçeyek ji hewldana desthilatdariyê ya xurtkirina desthilatdarî û serweriya Tifaqa Cûmhûr. Em li ber vê yekê radibin.”
Îskender Bayhan li ser avanî û karê komîsyonê fikrê xwe anî ziman û got, “Yek, divê hemû partiyên li meclîsê di nava komîsyonê de hebin, du; pîvana temsîla wekhev divê bi cih bê anîn û li komîsyonê her kes bi rengekî wekhev xwedî mafê axaftinê be. Bêguman ji aliyê pêvajoya biryarwergirtinê û dengdanê jî biryar divê li gorî hejmara zêde ya wekîlên beşdarî komîsyonê bûne werin wergirtin.
Li ser karê komîsyonê jî hin xisûs hene ku em dibêjin ‘bila bibe’. Dixwazim wan jî destnîşan bikim. Divê komîsyon bibe platformek ku sedemên heyî û dîrokî yên pirsgirêka Kurd, asta hevdîtinên li Îmraliyê ji meclîsê û raya giştî re radigihîne. Li gorî me, dema ku bi vî rengî bû wê komîsyon berpirsyariya xwe bi cih anî be û xizmet ji berjewendiyên gel û aştiyê re kiribe.
Ya duyemîn jî divê komîsyon pêvajoyeke welê bi rêxistin bike ku bi civîn û çalakiyan nêrînên hemû beşên civakê yên li ser pêvajoyê, meyla wan derxîne holê, pêvajoyeke berfireh a nîqaşê bi rêxistin bike. Divê bibe kursî, amûr û platforma vê yekê.
Ya sêyemîn jî; teqez sererastkirinên qanûnî yên lezgîn hene ku divê bêne kirin. Di serî de bidawîkirina qeyûman, derxistina efûyeke giştî ya siyasî, rawestandina operasyonên li derveyî sînor, rawestandina van tevgeran, nêzîkatiya ku dewlet tiliya xwe ji ser tektîkê vekişîne; biryar û sererastkirinên li ser van esasan bixe rojeva meclîsê.
Daxuyaniyên eniya Tifaqa Cûmhûr û Erdogan mixabin dûrî van e, mijarê ji demê re dihêlin, avêtina gaveke biçûk jî ji demê re dihêlin. Nepêkane ku ev rewş bê qebûlkirin.”
