Partiya Jiyana Azad a Kurdistanê (PJAK) têkildarî greva ku wê 29’ê Tîrmehê li seranserî Rojhilatê Kurdistanê û Îranê ji aliyê aktivîstên sivîl û hawirdorê ve bê destpêkirin daxuyaniyek nivîskî weşand.
PJAK’ê piştgiriya xwe ya ji bo çalakiya aktivîstên sivîl û hawirdorê nîşan da û bang li hemû civaka sivîl û pêkhateyên civakî, bi tyabet mamoste, rewşenbîr, karker, jinan û ciwanan kir ku cihê xwe di çalakiyan de bigirin.
PJAK’ê bal kişand bi ser şewatên ku her sal li çiyayên Zagrosê derdikevin û got: “Ev ne tenê felaketeke xwezayî ye, lê di heman demê de tahrîbateke siyasî ye jî.
Dema bi sedan hektar daristan dişewitin, xweza tê tinekirin. Em êşa ciwanên me yên fedakar ên ku di encama van şewatan de jiyana xwe ji dest dan, bi kûrahî dijîn.”
ŞEWAT SIYASÎ YE, PERPIRSYAR SAZIYÊN DEWLETÊ NE
PJAK’ê ragihandin ku wêrankirina hawirdorê bi bêxemiya hikûmetê re têkildar e.
PJAK’ê aktivîstên hawirdorê Hamîd Mûradî, Çiyako Yusufî Nejad û Xebat Emîne, yên ku di şewata li Çiyayê Aviyer ê Sineyê de jiyana xwe ji dest dan, bibîr anî. PJAK’ê aktivîstên jiyana xwe ji dest dane wekî “parêzvanên welat” binav kir û got: “Wan, weke Şerif Bacwer di vê rêyê de jiyana xwe feda kirin. Bêyî rawestandina vê wêrankirina sîstematîk a li dijî xwezayê, çareseriyeke rastîn nayê peydakirin.”
Di daxuyaniya PJAK’ê de hate gotin ku krîzên hawirdorê ne tenê li xwezayê, li ser civaka sivîl jî zordariyek e.
BANGA BERXWEDANA EKOLOJÎK
PJAK’ê diyar kir ku li hemberî êrîşên li ser xwezayê divê “tevgera rizgariya ekolojîk” bê avakirin û bertek nîşanî kêmbûna destwerdana hikûmetê û saziyên têkildar da. Di daxuyaniyê de hate gotin: “Ev trajedî careke din nîşan da ku di parastina hawirdorê de valahiyeke cidî heye. Kêmbûna îmkanên destwerdanê, jiyana gelê me û xwezayê dixe metirsiyê.”
‘EM BI HEVRE LI BER XWE BIDIN’
Di dawiya daxuyaniyê de greva giştî ya ku ji aliyê Komeleya Hawirdorê ya Kurdistan-Sineyê ve ji bo 29’ê Tîrmeha 2025’an hatiye ragihandin bi bîr xist û bang li tevahiya gel kir ku piştgiriya grevê bikin. PJAK’ê, ev grev wekî îfadeya berteka civakî li hemberî wêrankirina hawirdorê binav kir.
PJAK’ê bi taybetî bang li mamoste, karker, jin, ciwan û rewşenbîran kir û bi vê bangê daxuyaniya xwe bi dawî kir: “Werin, em bi hev re Hamîd, Çiyako û Xebat bi bîr bînin û ber bi pêşerojeke zelal û biryardartir gav bavêjin.”
