Meclisa Sûriyeya Demokratîk (MSD) der barê rewşa Siwêdayê û siberoja Sûriyeyê de daxuyaniyeke nivîskî weşand.
Daxuyanî wiha ye:
“Meclisa Sûriyeya Demokratîk bi fikareke mezin geşedanên xeternak ên ewlehiyê, şerên çekdar û kiryarên tundiyên yên li dijî sivîlên li Siwêdayê têne kirin, dişopîne. Ev kirin gefê li welêt dixwe ku bikeve krîzên kûrtir, û li gel xetimîna siyasî û nebûna dewleteke nîştimanî ya yekgirtî dibe sedema teqînek navxweyî ya mezhebî an herêmî.
Bûyerên ku îro li Siwêdayê rû didin bûyereke îzole nîn e, lê belê nîşaneke rasterast a hilweşîna giştî ya pêkhatina siyasî û sazûmanî ya welêt e. Ev hilweşîn encama siyasetên bi dehên salan ên dûrxistin, zordarî û paşguhkirina pêkhateyên nîştimanî ye. Di heman demê de encama têkçûna rayedarên navendî di bicihanîna berpirsiyariyên xwe yên rêvebirina cihêrengiyê û mîsogerkirina aştiya navxweyî de ye.
Em MSD teqez dikin ku ev geşedanên xeternak rasterast gefê li rêgeza yekitî û silametiya axa Sûriyeyê dixwin. Di heman demê de qanûna mirovî ya navneteweyî û mafên ewlehî û jiyaneke bi rûmet a sûriyeyan têk dibin. Ev geşedan her wiha lawaziya rewşa heyî nîşan dide. Lew ra jî pêdiviya lezgîn bi lêgerîna çareseriyên siyasî yên domdar derdikeve ku dawî li sedemên pevçûnê bîne,pêşî li dubarebûna bûyerên ewlehiyê li deverên din ên welêt bigirin.
Li ser vê yekê û ji ber berpirsiyariya me ya nîştimanî û exlaqî em teqeziyê li ser van xalan dikin:
1. Em hemû şêweyên tundûtûjiyê, pevçûnên çekdarî û kaosa ewlehiyê yên ku gefê li aştiya navxweyî li Siwêda û herêmên din ên Sûriyeyê dikin şermezar dikin. Em teqez dikin ku pêwîst e demildest hemû kiryarên dijminane ku çavkaniya wan kî bin bila bibin, werin rawestandin. Divê der barê van bûyeran de lêpirsînek serbixwe û zelal were destpêkirin, hesab ji berpirsên binpêkirinan were xwestin.
2. Em bi lezgînî banga destpêkirina diyalogeke nîştimanî ya berfireh dikin. Divê diyalog bi konferansek nîştimanî ya berfireh tacîdar bibe ku hemû hêzên nîştimanî yê demokratîk beşdar bibin. Lazim e armanca vê konferansê projeyek siyasî ya Sûriyeyê ya nû ya li ser bingeha dadmendiya veguhêz, bidawîanîna zordariyê û pejirandina pergalek demokratîk a nenavendî û piralî be ku beşdariya aktîvkirî ya hemû pêkhateyên gelê Sûriyeyê mîsoger bike.
3. Em hişyarî didin ku welat bişemite nava akokiyên hundirîn ên mezhebî û herêmî; ev yek jî gefan li hebûna stasuya dewleta Sûriyeyê û civaka wê ya cihêreng dixwe û bandorên wêranker li ser pêşeroja jiyana hevbeş û aştiya civakî çêdikin.
4. Ji ber rola wan a metirsîdar di teşwîqkirina pevçûnan û gefên wan ên li aştiya navxweyî û jiyana hevbeş, em banga rawestandina hemû gotinên nefretê û provokasyonên medyayî û siyasî dikin. . Em tekez dikin ku avakirina baweriya nîştimanî bi axaftin û platformê ya berpirsiyar û rêzgirtina li cihêrengiyê dest pê dike.
5. Divê hemû aliyên siyasî û leşkerî yên hundirîn, herêmî û navneteweyî berpirsiyariyên xwe yên yasayî, siyasî û exlaqî yên der barê rewşa berdewam de bi cih bînin. Em bang dikin ku divê rêz li qanûnên navneteweyî bê girtin. Divê rê li ber rol û destwerdanên ku dibin sedema gurkirina pevçûnan an jî bikaranîna wan ji bo rojevên teng bê girtin.
6. Her çareseriyek siyasî li Sûriyeyê divê bi tevahî sûriyeyî, berfireh û nîştimanî be. Divê çareserî li ser bingeha diyalog, lihevkirin û naskirina hevbeş be, ne li ser tundûtûjî, dûrxistin, destwerdanên derve be, ku avakirina dewletek demokratîk û sivîl a li gorî bingeha prensîba hemwelatîbûna wekhev, serweriya yasayî û rêzgirtina ji bo cihêrengiya neteweyî, çandî û olî mîsoger bike.
Di dawiyê de; di vê qonaxa dîrokî de, em banga xwe ya li tevahiya hêzên nîştimanî nû dikin ku berpirsyaryên xwe yên ji nû ve avakirina bawerî û aştiya navxweyî bi cih bînin. Em bang dikin ku dengê aqilê bidin pêş û provokasyon û parçebûnê rawestînin, her wiha gavan ber bi projeyeke nîştimanî ya demokratîk a giştî ve biavêjin ku Sûriyeyê ji tunela şer û hilweşînê derxe û asyonên nû yên azadî, edalet û îstiqrarê li pêşiya gelê wê veke.”
