Bajarê Hesekê di 8`ê Tebaxê de malovanî ji kombûneke dîrokî ya bi navê Konferansa Yekhelwestiya Pêkhateyên Bakur û Rojhilatê Sûriyeyê kir. Konferans bi tevlîbûna nêzî 500 nûnerên Rêveberiya Xweseriya Demokratîk, saziyên siyasî, leşkerî û ewlehî û nûnerên ji pêkhateyên Bakur û Rojhilatê Sûriyeyê pêk hat.
Gazî Mazlûm Efrîn têkildarî Konferansa Yekhelwestiya Pêkhateyên Bakur û Rojhilatê Sûriyeyê nêrînên xwe anîn ziman.
Mazlûm Efrîn di destpêka axaftina xwe de destnîşan kir ku di vê pêvajoyê de lidarxistina vê konferansê pir girîng e û got: “Sûriye di pêvajoyeke pir hesas re derbas dibe. Li gelek deveran li hember civaka Elewiyan û herî dawiyê jî li Suwêdayê li ser civaka Durziyan êrîşên hovane pêk hatin. Kesên xêrnexwaz timî dixwazin li Sûriyeyê fitne û xerabiyan pêş bixin. Lê belê Konferansa Yekrêziya Pêkhateyan nîşan da ku gel û baweriyên li Sûriyeyê wê li hember van xerabiyan yekîtiya xwe xurttir bikin.”
Mazlûm Efrîn piştre anî ziman ku Şoreşa Bakur û Rojhilatê Sûriyeyê ji bo tevahiya Sûriyeyê dibe mînakeke herî baş û wiha axivî: “Vê konferansê nîşanî hemû cîhanê da ku gelên Bakur û Rojhilatê û Sûriyeyê, her wiha gel û baweriyên cuda yên li tevahiya Sûriyeyê dixwazin bi awayekî wekhev û azad bijîn. Di konferansê de yek ji tişta herî berbiçav ew bû ku pirsgirêkên li Sûriyeyê ne bi şer û pevçûnan, bi qebûlkirina îradeya hemû gelan û baweriyan dikarin werin çareserkirin.”
Gazî Mazlûm Efrîn di dewama axaftina xwe de jî bal kişand ser pêngava ji hêla Rêber Apo ve hatiye pêşxistin û got: “Pêngava bi Banga Aştî û Civaka Demokratîk a Rêber Apo dest pê kir, li gel Bakurê Kurdistanê û Tirkiyeyê, bandoreke erênî li ser herêma me jî kiriye. Rêbertiya me timî alîgirê aştiyê ye. Bi salan e ji bo hemû gel bi awayekî azad û wekhev pêkve bijîn di nav têkoşînê de ye. Bi vê wesîleyê em Rêbertiya xwe jî silav dikin.”
Mazlûm Efrîn axaftina xwe bi van hevokan bi dawî kir: “Şoreşa Bakur û Rojhilatê Sûriyeyê bi xwîna bi hezaran hevalên şehîd, bi berdêlên giran ên hevrêyên me yên gaziyên şer û bi keda gelên me û ya jinên azadîxwaz ava bû û pêş ket. Em ê şoreşa xwe û nirxên wê heya dawiyê biparêzin.”
