Ji bo fermandarên pêşeng Koçero Urfa, Nûreddîn Sofî û Bahtiyar Gabar ên ku hefteya borî şehadeta wan hatibû ragihandin, li gelek bajaran merasîmên bîranînê hatin lidarxistin.
AMED
Bi pêşengiya MEBYA-DER, Meclisa Ciwanan a Partiya Wekhevî û Demokrasiyê ya Gelan (DEM Partî), Meclisa Ciwanan ên Partiya Herêmên Demokratîk (DBP) Nûreddîn Sofî, Koçero Ûrfa û Bahtiyar Gabar li navenda avahiya DEM Partiyê ya navçeya Peyasê ya Amedê merasîma bîranînê li dar xistin. Di bîranînê de endamên Komeleya Dayikên Aştiyê, Komeleya Çand û Hunerê ya Dîcle û Firatê, Federasyona Komeleyên Hiqûqî û Hevgirtinê yên Malbatên Girtî û Hikumxwaran a Medê (MED-TUHAD-FED), Komeleya Alîkarî û Hevgirtina bi Malbatên Girtî û Hikumxwaran re (TUHAY-DER), rêxistinên navend û navçeyên derdorê ên DEM Partî û DBPê û endamên saziyên civaka sivîl beşdarî bîranînê bûn.
Salona bîranê bi wêneyên kesên ku jiyana xwe ji dest dane, bifindan û qurnefîlan hate xemilandin. Bîranîn bi deqeyek rêzgirtinê dest pê kir. Piştî rêzgirtinê sînevîzyon hate pêşandan û ciwanan helbest xwendin. Di bîranînê de bênavber dirûşmeyên ‘Şehîd namirin’, ‘Bijî Serok Apo’ û ‘Ey şehîd xwîna te li erdê namîne’ hatin berzkirin.
Hevseroka MEBYA-DER’ê Gurbet Sevîktek di bîranînê de anî ziman ku di vê têkoşînê de gelek kêliyên hestiyar hatine jiyîn û wiha got: “Kesên di têkoşîna azadiya Kurdistanê de jiyana xwe ji dest dane, têkoşîna wan gelekî mezin bûye. Em li vir banga xwedîderketina li pêvajoya nû ya ku Rêberê Gelê Kurd Abdullah Ocalan daye destpêkirin dikin. Divê em xwedî li pêvajoya nû derbikevin.”
Bîranîn bi çepik û berzkirina dirûşmeyan bi dawî bû.
RIHA
Bi pêşengiya Meclîsa Ciwanan a Rihayê ya DEM Partî û KATDER’ê li avahiya DEM Partiyê ya Pirsûsê ya Rihayê merasîma bîranînê hate lidarxistin. Gelaka kes beşdarî bîranînê bûn. Di bîranînê de timî dirûşma “Şehîd namirin” hate berzkirin. Wêneyên sê şehîdan li hola bîranînê hatin daliqandin. Merasîm bi deqeyek erêzgirtinê dest pê kir. Piştî rêzgirtinê Dayikên Aştiyê find vêxistin.
Piştre, sînevîzyona li ser jiyan û têkoşîna Koçero Urfa, Nûreddîn Sofî û Bahtiyar Gabar hate pêşandan.
Piştre li ser navê KATDER’ê Makbule Yavuzer axivî û got, “Divê em ji bîr nekin ku ew çima şehîd bûn. Ew ji bo ziman, çand û Kurdistanê şehîd bûn. Divê em vê yekê ji zarokên xwe re rave bikin. Em ê şehîdên xwe ji bîr nekin. Ew ji bo Kurdistanê şehîd bûn.”
Ji Dayikên Aştiyê Adalet Çay jî di bîranînê de axivî û got, “Divê em rêya wan, şopa wan bişopînin. Divê em wan her tim di dilê xwe de hilgirin û wan bi bîr bînin. Wekî Dayikên Aştiyê, em her tim aştî dixwazin. Êdî xwîn nerije, êdî dayik negirîn.”
Li ser navê Meclîsa Ciwanan a DEM Partiyê Berîvan Kocaoglû axivî û got, “Wekî ku dayikan gotin, divê em xweî li têkoşîna hevalên xwe derkevin. Em dikarin bi mînakgirtina jiyan û têkoşîna şehîdan xwedî li wan derkevin.”
