Katz li ser medyaya dijîtal X’ê daxuyaniyek da û got: ‘’Wê di nêz de deriyên dojehê ji bo kujer û destdirêjên Hamasê yên li Xezeyê vebin. Wê ev yek heya qebûlkirina şertên Îsraîlê bi taybetî jî berdana hemû dîlgirtiyan û bêçekbûna Hamasê berdewam bike.’’
Her wiha Katz got: ‘’Ger vê yekê qebûl nekin wê Xeze veguhere paytextê Hamasê, Refah yan jî Beyt Hanunê.’’
Her du bajar jî ji ber şerê ku ev du sal in berdewam dike, li gel êrîşên Îsraîlê gelekî zirar dîtine.
NETANYAHU: JI BO DÎLGIRTIYAN HEMÛ RÊ LI SER MASEYÊ NE
Her wiha Serokwezîrê Îsraîlê Binyamin Netanyahu, roportajek da kanala bi navê One America News a Dewletên Yekbûyî yên Emerîkayê (DYE) û di roportaja xwe de diyar kir ku ji bo serbestberdana 50 dilgirtiyên mayî ew ‘’hemû rêyan dinirxînin.’’
Netanyahu diyar kir ku ji dîlgirtiyan herî kêm 20 kes sax in û 30 dîlgirtiyan jî jiyana xwe ji dest dane.
Serokwezîrê Îsraîlê Binyamin Netanyahu got: ‘’Armanca me ew e ku em di zûtirîn demê de hemû dîlgirtiyan rizgar bikin. Ger Hamas çekên xwe deyne û dîlgirtiyan serbest berde wê şer yekser bi dawî bibe. Ev jî ji bo Xezeyê tê wateya pêşerojeke cudatir.’’
Netanyahu bal kişand ser rewşa mirovî ya li Xezeyê û Hamas sûcdar kir ku ew dîlgirtiyan bi zanebûnî bernade û got: ‘’Li Xezeyê tekane xelaya organîzekirî ya Hamasê ye ku li dîlgirtiyan ferz dike.’’
Her wiha Netanyahu îdîa kir ku Îsraîlê ji bo alikariyê du ton xida şandiye herêmê.
