Dayikên Şemiyê, Dayikên Aştiyê û Weqfa Tahîr Elçî di civînên dawîn ên “Komîsyona Demokrasî, Xwişk-Biratî û Piştevaniya Millî” ya ku li Meclîsa Mezin a Tirkiyeyê hatiye avakirin de, hatin guhdarîkirin. Daxwaza wan a hevpar edalet bû.
Parlamentera CHP’ê Turkan Elçî ku di komîsyonê de ye û 10 sal in ji bo hevserê xwe Serokê Baroya Amedê Tahîr Elçî yê hatî qetilkirin têkoşîna edaletê dide ji ANF’ê re axivî.
Turkan Elçî, têkoşîna Tahîr Elçî ya li dijî kuştinên nediyar bi bîr xist û diyar kir ku bê edalet aştî ne pêkan e û got, “Edalet di bingeha aştiyê de ye; divê em ne tenê siberojê, di heman demê de bi rabirdûyê re jî rû bi rû bibin.”
Turkan Elçî, da xuyakirin ku ew ji ber pêvajoyên derbasbûyî hesas tevdigere û got ku lê car din tevlîbûna hemû aliyan di komîsyonê de bawerî çêdike. Turkan Elçî, diyar kir ku li ser navê CHP’ê di komîsyonê de cih girtin wekî berpirsyarî dibîne û got ku ew hem ji bo xwe û hem jî ji bo Tahîr Elçî têkoşîna aştiyê didomîne.
Turkan Elçî, da zanîn ku daxwaza edaletê di civînên komîsyonê de li pêş bû û got ku derbirîna êşên Dayikên Şemiyê û Dayikên Aştiyê rê li ber empatî û pêşxistina zimanekî hevpar vekir. Turkan Elçî, diyar kir ku rastîhevhatinên bi vî rengî dikarin zemîna aştiya civakî çêbikin.
Turkan Elçî, destnîşan kir ku ji bo lihevhatin û aştiya civakî divê dev ji zimanê cudakarî were berdan û mînaka Dayikên Aştiyê yên ku bi Kurdî axaftina wan di meclîsê de hat astengkirin bibîr xist û got ev yek bi xwe mînakek a cudakariyê ye. Turkan Elçî, diyar kir ku axaftina bi zimanê dayikê welêt parçe nake; berevajî vê qedexe tenê dibin sedema parçebûnê di nav civakê de.
Turkan Elçî, anî ziman ku têkoşîna wê berpirsiyariyeke mirovî û wijdanî ye û got, “Ev hewldan hewldana du kesan e: ya min û ya Tahîr Elçî ye, ku dema ji bo aştiyê têdikoşiya hat qetilkirin.”
Turkan Elçî, da zanîn ku ji bo avakirina aştiyê divê bi rabirdûyê re rû bi rûbûn çêbibe, ji bêcezatiyê hesabpirsînek çêbibe, dadgeheke serbixwe û dengekî wijdanî yê hevpar ava bibe.
