Li ser malperên meclîsê yên medya dijîtal daxuyaniya bi dîmen hate parvekirin. Rojnamevan Kanan Weqaf daxuyanî xwend. Di daxuyaniyê de avakirina “Meclîsa siyasî ya navîn û rojavayê Sûriyeyê” hate ragihandin.
Di daxuyaniyê de bang hate kirin ku pergala federasyonê li welat pêk were û hat gotin ku ji bo ku şer bi dawî bibe, aştî û edalet di navbera herêman de pêk were, federasyon çareseriya herî guncew e. Di daxuyaniyê de hate diyarkirin ku federasyon, derfetê dide yan jî maf dide herêman ku jêderên xwe bi xwe kontrol bike, li şûna hêzê, qanûnê esas bigire ji bo ku aloziyên hundirîn çareser bike.
Hate ragihand ku meclîs ji bajarên Lazîqiye, Tartûs, Hims û hin beşên Hemayê, Deşta Xabê pêk tê. Hate gotin ku ji ber ku hikûmeta Şamê siyaseta parçekirinê bi kar anî, Elewî dest bi vê însiyatîfê kiriye. Hate destnîşankirin ku ji bo ku gavên bên avêtin, hevbeşiya di navbera pêkhateyan de pêwîst e.
Di daxuyaniyê de hikûmeta Şamê bi “pergaleke terorîst a ku dest danî ser desthilatdariyê” hate tawanbarkirin û hate gotin ku serokkomarê Tirk Recep Tayyîp Erdogan piştgiriya vê hikûmetê dike. Her wiha hate diyarkirin ku meclîs pabendî biryara NY`ê ya bi hejmar 2254 e û bang lidarxistina kongreyeke nîştimanî ya nû bi çavdêriya NY`yê hate kirin.
Di daxuyaniyê de “hikûmeta yekreng” a ku dûrxistin û rêgezên olî ji xwe re kirine bingeh, hate redkirin û bang li “komên terorîst” hate kirin ku ji Sûriyeyê derkevin.
Di daxuyaniyê de hate gotin ku pergala federasyonê, ji bo Sûriyeyê çareseriya herî guncew e ji ber ku tenê bi rêya vê pergalê Sûriye ji avzêya aloziyan xilas dibe û li ser asta xwecih û herêmî istiqrarê bi dest dixe.
Piştî bidawîbûna daxuyaniyê, meclîsê nasnameya xwe ya dîtbarî li ser medya dijîtal belav kir.
