Dema ku Komîteya Wezîran a Konseya Ewropayê ji bo pêkanîna biryara ‘mafê hêviyê’ daye Tirkiyeyê wê Îlona 2025’na tijî bibe. Ji ber vê yekê saziyên Kurdan ên demokratîk ên li Ewropayê û dostên wan, wê ji 15’ê Îlonê û pê ve li Strasbourgê hin çalakiyan lidar bixin.
Siyasetmedarê Kurd Seydî Firat ji ANF’ê re axivî û anî ziman ku Tirkiyeyê berpirsyariyên xwe yên navneteweyî bi cih neaniye, tecrîdê hîn jî dewam dike û destnîşan kir ku azadiya Rêber Apo divê êdî teqez pêk were.
Seydî Firat berpirsyariyên Tirkiyeyê yên ji ber peymanên navneteweyî bi bîr xist ên ku mohra xwe daniye binî û ev nirxandin kir:
“Tirkiye, ji ber ku mohra xwe daniye binê peymanên navneteweyî divê vî mafî bi cih bîne. Bicihanîna vî mafî li pêşiya Tirkiyeyê wezîfeya bingehîn e. Lê belê Tirkiye heta niha xwe nade ber vê yekê. Xwevegirtin tê çi wateyê? Tê wateya bêhiqûqiyê, tê wateya tinehesibandina peymanên navneteweyî ku mohra xwe daniye binî. Ev nêzîkatî rast nîne.”
Firat ragihand ku polîtîkaya tecrîdê li hemberî girtiyên Kurd û Rêber Apo veguheriye bêhiqûqiyeke cidî û got, “Jiholêrakirina vî mafî, nedîtina vî mafî bêhiqûqî ye. Ya rast, cûreyekî êşkenceyê ye, binpêkirina hiqûqê ye.”
‘DIVÊ KONSEY HELWESTEKE HÎN XURT NÎŞAN BIDE’
Firat bi bîr xist ku Konseya Ewropayê demek ji Tirkiyeyê nas kir, lê belê li gel ku hindik maye ev dem tijî bibe hîn gaveke şênber nehatiye avêtin û destnîşan kir ku li hemberî Tirkiyeyê divê helwesteke hîn şênber û xurt bê nîşandan.
Firat diyar kir ku azadiya Rêber Apo yek ji esasên bingehîn ên çareseriya demokratîk û aştiyane ya pirsgirêka Kurd e û got, di heman demê de pîvana samîmiyeta dewletê ye. Firat ragihand ku rakirina tecrîdê bi tena serê xwe wê têrê neke û got, divê Rêber Apo weke mirovekî azad karibe tevbigere.
Seydî Firat ji bo rêze çalakiyên ku 15’ê Îlonê li ber avahiya Konseya Ewropayê bidin destpêkirin got, li Strasbourgê zêdeyî deh sal in her hefte çalakiya nobedê tê lidarxistin, lê vê carê wê bi tevlîbûneke girseyî xurt bikin. Firat bal kişand ser girîngiya tevlîbûna ji bajarên cuda yên Ewropayê û ev bang kir: “Tevlîbûn çiqasî xurt be, helwesta Ewropayê ya li hemberî Tirkiyeyê jî wê ewqasî şênber bibe. Di vê pêvajoya krîtîk de çalakiyên gelê me, hêzên demokratîk ên şoreşger, rêxistin û rewşenbîran gelekî hêja ne.”
