Endamê Desteya Hevserokatiya PYD’ê Salih Muslim di roja duyemîn a Kongreya Hevpeymaniya Sosyal Demokrat a Welatên Erebî de axivî.
Salih Muslim di axaftina xwe de got: “Tevî evqas êrîş û ambargoyên ku ji aliyê Tirkiye ve li ser herêmên me pêkhatin, lê me li berxweda û niha jî li Rojavayê Kurdistanê ezmûnek me ya bê hempa heye. Em dixwazin di avakirina siberoja welatê me de şirîkê hevbeş bin.”
Di dewama axaftina xwe de da diyarkirin ku li Rojhilatê Suriyeyê modeleke demokratîk a jiyana hevbeş ya bêhempa hatiye avakirin û got: “Me kariye parastinê li vê projeya xwe bikin û ji bo vê çendê jî me sûd ji felsefeya birêz Ocalan wergirtiye. Ezmûna me li Rojhilata Navîn ezmûneke taybet e. Bi taybetî li cihek wek Sûriye ku gelek kes ne li bendê bûn. Ew nenavendîbûna ku em dixwazin dikare ji bo Sûriye û herêmê bibe projeyeke aştiyê.”
Hêjayî gotinê ye ji duh ve li Silêmaniyê Kongreya Hevpeymaniya Sosyal Demokrat a Welatên Erebî destpêkiriye. Ji bo tevlibûna kongreyê şandeya PYD’ê ji Rojava û şandeyek jî ji DEM Partiyê ji Bakurê Kurdistanê hatine Silêmaniyê.
KUBAT TALABANÎ: EM PIŞTGIRIYÊ DIDIN PÊVAJOYA ÇARESERIYÊ
Cîgirê Serokê hikûmeta demborî yê Herêma Kurdistanê Qubad Talebanî di kongreyê de têkildarî pirsgirêkên di navbera Herêm û Bexdayê her wiha pêvajoya çareseriya pirsa Kurd a li Bakurê Kurdistan û Tirkiye de axivî.
Talebanî li ser pirsgirêkên di navbera Hewlêr û Bexdayê de got: “Heta niha jî li Iraqê Kurdan hemû mafên xwe yên desturî wernegirtine. Divê pirsgirêkên Herêm û Bexdayê bi rêya diyalogê û li ser bingehê destûra bingehîn werin çareserkirin.”
Talebanî da zanîn ku wek YNK ew ji hemû demê zêdetir ji bo çareserkirina pirsgirêkan di nav hewldanan de ne.
Di derbarê pêvajoya çareseriya pirsgirêka Kurd a li Bakurê Kurdistan û Tirkiyeyê jî Qubad Talebanî got: “Em piştgiriya pêvajoya çareseriyê ya li Tirkiyeyê dikîn. Heta pirsgirêka Kurd li Tirkiye, Îran û Sûriyeyê çareser nebe, wê pirsgirêkên van welatan jî çareser nebin.”
