Serokê Baroya Amedê Abdulkadîr Guleç li ber Edliyeya li Amedê axivî û diyar kir ku di mijarên serxwebûna dadgeriyê, azadiya îfadeyê û mafê darizandina edlî de pirsgirêk kûr bûne.
Guleç destnîşan kir ku bicihneanîna biryarên Dadgeha Mafên Mirovan a Ewropayê û Dadgeha Destûra Bingehîn hêviya çareseriyê ya li nava civakê lawaz kiriye.
Guleç got, “Çareseriya pirsgirêka Kurd bi destûreke bingehîn a nû dibe ku xwe bispêre hevpeymaniya civakî, pirreng, demokratîk be û her kesî weke welatiyên wekhev qebûl dike.” Guleç destnîşan kir ku bicihanîna biryarên Dadgeha Mafên Mirovan a Ewropayê ji bo serweriya hiqûqê mecbûrî ye.
Serokê Baroya Mêrdînê Ahmet Dûyan jî di daxuyaniyê de anî ziman ku li gel zextê ew bi hêvî ne ku edalet ji bo her kesî pêk were.
Dûyan ragihand ku ji bo mafên welatiyan û hemû beşên civakî wê têkoşîna xwe dewam bikin û xwest, sala nû ya edlî bibe saleke welê ku mafê jiyanê û azadiya îfadeyê ewle dike.
Daxuyaniyên herdu baroyan bi pîrozkirina 1’ê Îlonê Roja Aştiyê ya Cîhanê bi dawî bû.
