Dema Bayrou yê ku ji neh mehan kêmtir wekî serokwezîr ber bi dawiyê ve diçe, ji bo hilbijartina serokwezîrekî nû hemû çav li ser Serokkomar Emmanuel Macron in.
Ji saet 15:00’ê pê ve Bayrou dê li Parlamentoyê axaftinekê bike da ku pakêta teserûfê ya 44 mîlyar euroyî ya hikûmeta xwe ya ku ji bo sala 2026an tê pêşbînîkirin biparêze. Lêbelê encamên dengdanê ku dê di saet 19:00’an de werin ragihandin xuya dike ku hikûmet dê dengdana baweriyê wernegire, ji ber ku hevpeymaniya Macron piraniya parlamentoyê tune.
Deynê giştî yê Fransayê gihîştiye %114. Ev rewş digel krîza siyasî, welêt dixe nava bêçarebûnek kûrtir.
KÎ WÊ BIBE SEROKWEZÎRÊ NÛ?
Serokkomar Macron ji ber îxtimala ketina hikûmetê vê qasê vebijarka fesixkirina Parlamentoyê ji rojevê derxistiye. Li gorî daxuyaniyên ji derdora Élysée, Macron dixwaze pêvajoyê zû biqedîne û serokwezîrekî nû destnîşan bike.
Partiya Sosyalîst (PS) deriyê hevpeymanek bi bloka Macron re girtiye û “amadebûna xwe ji bo hikûmetek çepgir” ragihandiye. Lêbelê stratejiya Macron ew e ku bloka navendî ya ku wekî “socle commun” tê zanîn, berfireh bike û profîlek rastgir an jî navend-rastgir a ku ji hêla PS’ê ve tê qebûlkirin pêşve bibe.
Di qûlîsan de behsa Wezîrê Parastinê Sébastien Lecornu, Wezîrê Dadê Gérald Darmanin û Wezîrê Aboriyê Éric Lombard tê kirin. Lêbelê, “xetên sor” ên partiyan nîşan didin ku avakirina hevpeymanek berfireh û mayînde wê dijwar be.
KOLAN TEVLIHEV DIBIN
Krîza siyasî tevgerên civakî jî dixe dewrê. Tevgera “Bloquons tout (Werin em her tiştî asteng bikin)” ku di tevahiya havînê de li ser înternetê xwe organîze kir û ji hêla partiyên çepgir û hin sendîkayan ve tê piştgirîkirin, roja çarşemê banga çalakiyên li seranserê welêt kir. Çalakiyên plankirî dorpêçkirina deverên stratejîk, pêşkêşkirina kabînên bêpere yên bacê û sabotajkirina radar û ATM’yan in.
Di vê navberê de sendîka ji bo grevek li seranserê welêt û xwepêşandanên girseyî di 18’ê Îlonê de amade dibin. Di vê atmosferê de ajansa nirxandina krediyê Fitch dêwê roja înê krediya Fransayê binirxîne.
RASTGIRÊN RADÎKAL DIXWAZIN HILBIJARTIN ÇÊBIN
Di vê navberê de Rassemblement National (RN) ya rastgir a radîkal hilbijartinên pêşwext wekî rêyeke çareseriyê dibîne. Li gorî anketên dawî RN û hevalbendên wê dê di hilbijartinek potansiyel de %33 dengan bistînin û ev yek jî wê wan di rêza yekem de bi cih bike. Ev hejmar wê hem ji lihevkirina çepgir û hem jî ji kampa Macron derbas bibe.
