Komîsyona Demokrasî, Xwişk-Biratî û Piştevaniya Mîllî ya ji bo çareseriya pirsgirêka Kurd ava bûye, bi civîna xwe ya 13’emîn karê xwe dewam dike.
Nûnerê Komeleya Hiqûqnasan Mehmet Melîh Gulseren di civînê de axivî û anî ziman ku ji bo serketina pêvajoyê divê gavên cihê baweriyê bêne avêtin û sererastkirinên hiqûqî bêne kirin.
Gulseren diyar kir ku serersatkirina mewzûatên weke Qanûna Înfazê û Qanûna Têkoşîna li dijî Terorê divê bikeve rojevê û bi bîr xist ku Darbeya 12’ê Îlonê xisar li avaniya demokratîk û civakî kir.
Gulseren got, “Ji damezrandina komara me û vir ve demokrasiya me nebû amûreke rêveberiyê ku her welatî ji xwe bibîne. Darbe û pêkanînên hilweşîner ên rejîmên wesayita leşkerî li pêşiya yekbûna dewlet û milet demeke dirêj bû asteng.”
Gulseren ragihand ku pêvajo divê li ser bingeha ‘samîmiyetê’ bi rê ve biçe û anî ziman ku avaniya unîter a dewletê xeta sor e.
Gulseren işaret bi girîngiya tevkariya civakê ya li pêvajoyê kir û got, “Nexşerêya ku komîsyon amade bike jî divê xwe ji vê dewlemendî û dilsoziyê xwedî bike. Di rêveçûna pêvajoyê de divê em çareseriyên şênber hilberînin.”
Gulseren destnîşan kir ku li hemberî çalakî û parvekirinên provokatîf divê sererastkirinên qanûnî bêne kirin û got, eger pêwîstî pê hebe divê li ser parvekirinên bi naveroka nefretê ya li medya dîjîtal ceza bê ferzkirin. Gulseren her wiha anî ziman ku ji bo afirandina baweriyê SMS ên agahdarkirinê yên Kurdî dikarin bêne şandin.
Gulseren axaftina xwe bi vî rengî dewam kir, “Li gorî me sererastkirinên destpêkê divê baweriyê bidin civakê. Bi taybetî sererastkirinên têkildarî mafên civakî divê bi cih bêne anîn. Li gel vê yekê sererastkirina mewzûatên weke Qanûna Înfazê, Qanûna Têkoşîna li dijî Terorê divê bikevin rojevê.”
Gulseren herî dawî got, girîng e pêvajo li ser zemîna hiqûq û edaletê bi pêş ve biçe.
