Bi sedan şêniyên Kantona Firatê, endamên saziyên Rêveberiya Xweser, rêxistinên jinan, Hêzên Ewlekariya Hundirîn, partiyên siyasî û saziyên sivîl, cenazeyên şervanên Hêzên Sûriyeya Demokratîk (QSD) Hemze (Xalid Hesen) û şehîd Mihemed (Mihemed Şêx Hesen) ku di 1`ê Cotmeha 2025`an li Sirîn Qeseq şehîd bûbûn, li pakrewangeha Şehîd Dîcle veşartin.
Her wiha gerîlayê Hêzên Parastina Gel (HPG) şehîd Şiyar Qeremox (Mahmûd Bekar) ku di 12`ê Sibata 2025`an de li Heftanînê ya Herêmên Parastinê yên Medyayê şehîd bûbû, hat bibîr anîn.
Piştî deqeyek rêzgirtinê, hevseroka Meclisa Malbatên Şehîdan a Kantona Firatê Sara Xelîl sersaxî ji malbatên şehîdan re xwest û soza şopandina rêya şehîdan da.
Sara diyar kir ku şervanan her tim di xeta pêş de bûn û wiha domand: “Şehîdên me ji bo ku gelê xwe û axa xwe biparêzin canê xwe feda kirin. Her tim li hember dijmin têdikoşin û li berxwe didin. Em ê jî xwedî li berxwedana şehîdên xwe derkevin û em ê şopdarên rêça şehîdên xwe bin. Em ê tu carî xwîna şehîdên xwe li erdê nehêlin.”
Endamê Meclisa Leşkerî ya bajarê Kobanê Mehmûd Dêmo wiha axivî: “Şervanan her tim hemberî dijmin berxwedaneke bê hempa meşandin. Şehîd Hemze û Mihemed her tim bi têkoşîna xwe dihatin naskirin. Em jî wek Meclîsa Leşkerî soz didin ku em ê şopdarê rêya wan bin, xewn û xeyalên wan pêk bînin. Şehîdên me xeta sor in, em ê xwedî li mîrasa wan derkevin û xwîna wan li erdê nehêlin.”
Li ser navê malbata şehîd Mihemed, Ismaîl Ismaîl axivî û anî ziman ku ew bi şehîdan xwe serbilind in û soz da ku ew ê tola şehîdên xwe ji dijmin hillînin û rêya şehîdan bişopînin.
Piştî axaftinan wesîqeyên şehadetê yên şehîdan hatin xwendin û radestî malbatên wan hatin kirin.
Dûre cenazeyên şehîd Hemze û şehîd Mihemed bi dirûşmên “Şehîd namirin” hatin veşartin.
