Xelkê kantona Firatê sersaxî da malbata şehîd Hemze û şehîd Mihemed. Konê sersaxiyê yê şehîd Hemze li gundê Boxazê yê Kobanê û yê sersaxiya ji bo şehîd Mihemed li gundê Mîlê ya bajarê Çelebî hat danîn.
Di sersaxiya şehîd Hemze de berdevka Însiyafa Azadiya Rêber Abdullah Ocalan Eyşe Efendî sersaxî ji malbata şehîd re xwest. Eyşe Efendî anî ziman ku ew ê tola şehîdên xwe ji dijmin hilînin û wiha got: “Şehîdên me her tim li hember dijminê hovane berxwedaneke bêhempa da meşadin. Şervanên me di eniya pêş de li hember dijmin têkoşîn raber kir. Da ku parastina axa xwe bikin, xwedî li gelê xwe û welatê xwe derkevin canê xwe feda dikin.”
Hevserokê Desteya Jîngehê ya Kantona Firatê Arif Balî diyar kir ku ew ê xewn û xeyalên şehîdên xwe pêk bînin û got: “Şehîdên me xwedî fikara azadiyê ne, ji bo azadiyê azadî û demokrasiyê têkoşîn dikin, divê em jî xwedî li mîrasa şehîdên xwe derkevin û xwîna wan li erdê nehêlin.”
Di sersaxiya şehîd Mihemed yê li gundê Mîlê de jî hevserokê Desteya Kar û Barên Civakî Ehmed Xoce axivî û got: “Em di qonaxeke hesas re derbas dikin, ji ber ku vê yekê em gelek bedel didin. Şervanên me bi hemû hêza xwe têkoşîn dikin û ji bo axa xwe ji dijmin biparêzin, canê xwe fedayî malbat, gel û axa xwe dikin. Divê em jî xwedî li keda şehîdên xwe derkevin û şopdarê rêça wan bin.”
Li ser navê malbata şehîd Mihemed, Ismaîl Ismaîl anî ziman ku ew bi şehîdên xwe serbilindin û ji şehîdên xwe hêz digirin û got: “Em bi şehadetê xemgîn nabin, berovajî vê yekê hêz û vîna me xurtir dibe û kîna me li hember dijmin xurtir dibe. Em jî wek malbata şehîd Mihemed soz didin ku xwîna şehîdên xwe li erdê nehêlin û rêça şehîdên xwe bişopîn in.”
Şehîd Hemze (Xalid Hesen) û şehîd Mihemed (Mihemed Şêx Hesen) di 1`ê Cotmeha 2025`an de di qezayeke leşkerî de li Sirînê şehîd bûbûn.
