Hikûmeta veguhêz a Sûriyeyê biryanameya bi hejmara 188ˋan a sala 2025`an a der barê roj û cejnên fermî de derxist. Di biryarnameyê de gelek roj û cejnên gelê Kurd û gelên din ên Sûriyeyê hatine paşguhkirin û rakirin. Pêkhateyên Sûriyeyê li hember vê biryarê hêrsa xwe nîşan da û got ev berdewama metoda dûrxistin û paşguhkirinê ye ku rejîma berê pêk dianî.
Di biryarnameyê de roja 21`ê Adarê, ku Cejna Newrozê ye nehatiye destnîşankirin û li şûna wê biryara rejîma berê ya Baasê ku roja 21`ê Adarê kiribû Roja Dayikan hatiye bicîkirin.
Newroz ji bo gelê Kurd li Sûriyeyê û gelek deverên Kurdistanê cejnek neteweyî ya pîroz e, û li gelek welatên wekî Îran, Afganistan, Azerbaycan û welatên Asyaya Navîn tê pîrozkirin.
UNESCOˊyê di 2010ˊan de, Newroz nas kir û xist nav lîsteyên Mîrateya Çandî ya Nemadî ya Mirovahiyê, û 21ˊê Adarê wekî rojek navneteweyî ji bo pîrozkirina wê destnîşan kir.
Tevî vê naskirina gerdûnî, hikûmeta veguhêz a li Sûriyeyê şopa rejîma berê ya Sûriyeyê domand. Rejîma berê di sala 1988`an de biryarnameya bi hejmara 104ˊan derxistibû û 21`ê Adarê wekî “Roja Dayikan” destnîşan kiribû.
Di biryarnameya nû de cejna Akîto, cejna neteweyî ya Suryanî, Asûrî û Kildaniyan, ku her sal di 1`ê Nîsanê de tê pîrozkirin û yek ji kevintirîn cejnên dîroka mirovahiyê ye, hatiye paşguhkirin.
Hikumetê çend cejnên neteweyî yên Sûriyeyê jî paşguh kirine, bi taybet Roja Şehîdan, ku di 6`ê Gulanê de tê pîrozkirin, roja ku Osmaniyan gelek rewşenbîr û çalakvanên Sûriyeyê li Qada Mercê ya Şamê bi darve kirin e.
Çavdêran ev gav weke polîtîkayek sîstematîk a li dijî pirrengiya çandî û nasnameya cihêreng a gelên Sûriyeyê nirxandin. Hat gotin ku her pêvajoyeke siyasî yan nivîsandina destûreke nû ku mafên hemû pêkhateyên etnîkî û olî paşguh bike, ne dadperwer û ne jî rewa ye.
