Navenda Ragihandinê ya Hêzên Sûriya Demokratîk (QSD) encamên operasyona ewlehiya ya hevbeş bi Hêzên Ewlekariya Hundirîn re li gundewarê Eyn Îsayê eşkere kirin.
Daxuyaniya QSD`ê bi vî rengî ye: “Di operasyona ewlehiyê ya ku hêzên Komandos bi hevkariya Hêzên Operasyonan û Hêzên Antî Terorê (HAT) yên Hêzên Ewlekariya Hundirîn li bajarokê Hîşe û dora wê û rojhilatê bajarokê Eyn Îsayê dest pê kiriye de, 71 kes hatin girtin.
Di nav wan de kesên girêdayî DAÎŞ`ê, kesên ku destê wan di torên sûcên birêxistinkirinê, dizî, şêlandin û bazirganiya narkotîkê de hene, kesên tev li êrîşên li dijî ewlehiya herêmê û sivîlan bûne, hene.
Di operasyonê de miqdareke zêde ya çek û cebilxaneyê yên ku kesên girtî, di êrişên terorîst de bi kar dianîn, hatin desteserkirin.
Bi vê operasyonê, me rê li pêşiya van şaneyan girt ku hewl didan ewlehiya navxweyî têk bibin. Em piştrast dikin ku serdegirtinên stargehên rêxistinên terorîst li gorî rêgezên operasyonên ewlehiyê û di çarçoveya parastina sivîlan de, hatin lidarxistin.
Em careke din destnîşan dikin ku xebatên me li dijî bermahiyên DAÎŞ`ê û ji bo tunekirina torên sûcên birêxistinkirî berdewam in.”
