Rêveberiya Xweseriya Demokratîk a Kantona Tebqayê ya Herêma Bakur û Rojhilatê Sûriyeyê bi daxuyaniyekê êrişên dawîn ên çekdarên girêdayî hikumeta veguhêz a Sûriyeyê yên li dijî bajarê Dêr Hafirê yê girêdayî kantonê ku di encamê de hejmarek kes şehîd û birîndar bûn, şermezar kir.
Di daxuyaniyê de endamên Rêveberiya Xweseriya Demokratîk a kantonê, deste û saziyên girêdayî wê, partiyên siyasî, Kombûna Jinan a Zenûbiya, rêxistinan û şêx û rûspiyên eşîran û oldar amade bûn.
Di daxuyaniyê de hat gotin ku di demekê de gelê herêmê, piştî salên şer û zehmetiyan, bi hêviya jiyaneke ewle û aram e, hîna jî êriş lidijî vî gelê dewam dikin. Hêzên dewleta Tirk a dagirker û baskên wê deriyê Dêr Hafirê topbaran kir. Di van êrişan de cudahiyê naxin navbera sivîl, leşker û nexweşan.
Rêveberiya Xweser di daxuyaniya xwe de êrişên li dijî Dêr Hafir û gundewarê wê şermezar kirin û da zanîn ku li gel peymana 10ˊê Adarêya bi hikumetê re hatiye îmzekirin û divê gavekê ber bi aramiyê biavêje û ji rageşiyê bi dûr bikeve, lê êriş dewam dikin.
Di dewama daxuyaniyê de hate destnîşankirin ku dubarebûna van êrişan bêrêziyeke aşkera ya li hember jiyana sivîlan û binpêkirina yasayên navneteweyî û peymanên siyasî ye.
Di daxuyaniyê de bang li civata navneteweyî hat kirin ku van êrişên dubare yên ku aramiyê têk dibin û zehmetiyên şêniyan zêde dikin, rawestînin.
Rêveberiyê bang li hêzên navneteweyî, rêxistinên mafên mirovan, aliyên xwecihî û herêmê kir ku bi berpirsiyarên xwe yên exlaqî û yasayî ya parastina sivîlan û bidawîkirina van êrişên dewleta Tirk a dagirker rabin.
Di daxuyaniyê de hate gotin: “Em Meclisa Rêvebera a Kantona Tebqayê girêdana xwe bi aştî û diyalogê ve dubare dikin, şer û êrişan red dikin. Em sersaxiyê ji malbatên şehîdên di vê êrişê de zarokên xwe winda kirine diwazin. Şîfayê ji birîndaran re dixwazin.”
