Endamê Komîteya TEV-ÇAND’ê Nûrettîn Demîrtaş bi wesîleya savlegera komploya navneteweyî ya 9’ê Cotmehê axivî ku li dijî Rêber Apo hate kirin.
Nûrettîn Demîrtaş di destpêka axaftina xwe de got, “Beriya her tiştî komploya navneteweyî ya 9’ê Cotmehê bi hêrs şermezar dikim. Rêber Apo ku 27 sal in li hemberî vê komploya kapîtalîzma global bê navber têdikoşe, berxwedana gelên me silav dikim.”
Nûrettîn Demîrtaş di şexsê Halît Oral de şehîdên ‘Hûn nikarin roja me tarî bikin’ bi bîr anî û got, “Rêber Apo heta roja îro rastiya komploya 9’ê Cotmehê bi têrkerî raxist pêş çavan. Komplo ronî kir ku li hemberî wê têkoşîn karîbû bê meşandin. Sira meşandina têkoşîna serketî bi fêhmkirina armanca komployê ya di dema xwe de bû.”
Endamê Komîteya TEV-ÇAND’ê anî ziman ku di asta heyî de eger hêzên sosyalîst, demokratîk karibin rastiya komployê fêhm bikin wê bêhtir têbigihêjin bê li Rojhilata Navîn çi diqewime, ji niha û pê ve çi dikare bê kirin û axaftina xwe bi vî rengî dewam kir:
“Mînak, piştî ku hesabên hêzên global ên li ser Rojhilata Navîn, rêgeha wan a enerjiyê û ewlekariya wê bi rengekî şênberî ketin rojevê, hingî armancên wan bêhtir hatin fêhmkirin. Halbûkî ev yek ji doh ve diyar bûn. Li gel vê yekê hin hêzan her tim hewl dan hêza herî dînamîk a herêmê Kurdan bixin bin bandora xwe, vê hewldana xwe hîn jî dewam dikin. Eger pirsgirêk li ser zemîna demokratîk neyê çareserkirin, vediguhere qadeke welê ku hêzên global karibin li ser wê polîtîkayê bimeşînin, lîstikê bilîzin. Rêber Apo ji bo vê yekê ji destê wan derxîne 27 sal in di nava hewldaneke bêhempa de ye. Ji bo ev hewldan bê fêhmkirin divê her kes rastiya Rêbertî fêhm bike ku 27 sal in cihekî weke darbestê, goristanê, bîra mirinê li ber xwe dide û di helwesta xwe ya ji bo aştiyê de israr dike.
Eger ev yek rast bê fêhmkirin, hingî her kes wê bi rengekî rast xwedî li têkoşîna aştiyê derkeve. Eger komplo weke teoriyeke giştî bê nirxandin, dîroka wê bê lêkolîn, bê pirsîn bê di kîjan qonaxa mirovahiyê de derkete holê, li hemberî kê hatiye kirin, hingî weke ku Rêber Apo di manîfestoyê de destnîşan kir, weke ku bi têgeha kujer ê kastîk pênase kir, xwedî dîrokeke welê ye ku digihêje heta 30 hezar salî. Komploya destpêkê li hemberî jinê hate kirin. Komploya dawî jî li hemberî xeta azadiya jinê hate kirin. Rêber Apo diyar kir ku azadiya civakê bi azadiya jinê dibe û têkoşîneke mezin a sosyalîzmê afirand. 9’ê Cotmehê komployek li hemberî têkoşînên sosyalîst e. Weke ku li hemberî Che Guevara, Denîz Gezmîşan hate kirin li hemberî Rêber Apo nûnerê têkoşîna sosyalîst e û li nûnerê xeta azadiya jinê ye, komplo hate kirin.”
Nûrettîn Demîrtaş ragihand ku ew dikevin nava pêvajoyeke welê ku ji gelek aliyan ve li komploya navneteweyî dipirsin û got, “Em qala aştiyeke civakî dikin ku bi her awayî encamên komployê ji holê radike. Em qala avakirina civakîkirina aştiyê û afirandina zemîna çareseriya demokratîk dikin. Em di wê pêvajoyê de ne ku dikare komployê bi hemû encamên xwe ji holê rake. Lewma pêvajoyeke cihê kelecanê ye.
Di vê demê de diyalog, nîqaş, komîsyona li meclîsê heye… Şaş e ku mirov bifikire ku bi hevdîtinên komîsyona meclîsê re wê her tişt çareser bibe. Rewşenbîr, hunermend qala civakîkirina aştiyê dikin. Belê, em ê aştiyê çawa civakî bikin? Eger tê gotin, tenê bi diyalogê, bi nîqaşê yan jî bi komên ku komîsyonê hevdîtin bi wan re kiriye wê pirsgirêk çareser bibe, civakîbûna aştiyê pêk nayê. Ji bo civakîbûna aştiyê divê her kes xwedî lê derkeve.
Gelekî balkêş e. Me hemûyan dît, beriya niha bi 20 salan jî têkoşîna aştiyê gelekî xurt bû. Em niha bala xwe didin wan gavan ku bi pêşengiya Rêber Apo têne avêtin. Tê gotin, di dîrokê de gaveke bi vî rengî fedakariyeke bi vî rengî nehatiye dîtin. Her kes silav dike. Lê belê li aliyê din, têkoşîna aştiyê civakî nabe. Di asteke têrker de xwedî lê nayê derketin. Diyar e di nêrînê de şaşitiyek heye. Yanî têrê nake ku ev yek tenê bi tirsê, bi fikaran bê girêdan. Ne ku ji ber her kes ditirse, bi vî rengî dibe.
Dibe ku nêrîneke şaş hebe. Dibe ku ji ber vê têgihiştinê, ‘Ji xwe çek hatin şewitandin Agirbest hate ragihandin. PKK’ê kongreya xwe kir û xwe fesixkirin Lewma di berdêla vê de jî diyalog tê kirin û pirsgirêk çareser dibe’ helwesteke lawazî heye, pozîsyoneke tenê temaşekar heye. Halbûkî têkoşîna aştiyê divê civakî bibe. Hingî wê zexteke civakî biafire. Xwedî li aştiyê bê derketin. Aştî şênber bibe. Ji rewşa neşênber û xusûseke teorîk rizgar bibe. Pêwîstiyên hiqûqî jî wê bi vî rengî bikevin rojevê. Gavên demokratîk jî dikare bi vî rengî bê avêtin. Eger civak xwedî lê derkeve, divê beriya her tiştî rewşenbîr, hunermend bi rola pêşengiyê rabin.”
Nûrettîn Demîrtaş anî ziman ku di rewşa heyî de nêzîkatiyeke ku tenê lê dinihêre heye û got, “Bêguman ev yek ji bo her kesî derbas nabe. Gelek rewşenbîrên hêja yên Tirkiyeyê, rewşenbîrên li qada navneteweyî hene ku xwedî lê derdikevin û ji bo vê jî têdikoşin. Lê belê eger aştî civakî nabe, hingî ev yek ji ber kêmaniya di tevlîbûnê de ye. Ji ber vê jî bêyî ku li bendê bisekine, divê her kes xwedî li aştiyê derkeve. Vaye bi pêşengiya TJA’yê meşa jinan tê lidarxistin. Bi rastî jî pêşengiyê ji pêvajoyê re dikin. Ji me hemûyan re dibe mînak. Eger rewşenbîr, hunermend, ciwan li her derê tevlî nava têkoşîna aştiyê bibin wê rastiyeke aştiyê derkeve holê ku bi milyonan mirov xwedî lê derdikevin. Çareseriya demokratîk bi vî rengî dibe. Eger ji civakê re nebe mal, eger aştî civakî nebe hingî li pêşiya me xeterî hene. Rêber Apo timî balê dikişîne ser van xeteriyan û dem bi dem qala pirsgirêkê dike. Belê, her ku li demê belav dibe zemîna destwerdanê ji bo hêzên global û herêmî xurt dibe.
Zemînê dide wan hêzan ku dixwazin provoke bikin. Divê neyê gotin, aliyan samîmiyeta xwe nîşan dan, lewma wê her tişt çareser bibe, biqede. Belê samîmiyet girîng e, lê belê bi qasî wê divê civak xwedî lê derkeve, aştî civakî bibe. Girîng e ku ev yek veguhere têkşoîneke demokrasiyê.”
Endamê Komîteya TEV-ÇAND’ê Nûrettîn Demîrtaş destnîşan kir ku heta pêvajo veneguhere çalakiyên aştiyê yên bê navber, zehmet e ku rengê wê veguhere veguherîna demokratÎk û got, “Belê, veguherîna demokratÎk û avakirina civakî ne pêvajoyeke welê ye ku ji bo sibe bê taloqkirin. Divê em ji îro destpê bikin, hewl bidin û bixebitin.
Bersiva herî bi wate ya ji komploya navneteweyî re bê dayin veguherîna demokratîk û avakirina civakî ye. Lê belê li gel vê yekê pirsgirêkeke aştiyê li pêşiya me ye. Pêvajoyekê destpê kiriye ku pirsgirêka Kurd ber bi zemîna çareseriya demokratîk ve bê kişandin. Lê belê belavkirina vê pêvajoyê li demê zerarê dide Ya ku dawî li vê zerarê bîne jî civak bi xwe ye. Eger di asta civakî de xwedî li aştiyê bê derketin, her wê bi şahiyan bê pêşwazîkirin. Her roj wê bi rastî jî weke cejnê bê pêşwazîkirin Kî wê li ber vê rabe? Yên li ber rabin ew ê ku ji şer, ji xwînê xwe xwedî dikin. Em dikarin li hemberî dan bendeke civakî ava bikin.
Civakîkirina aştiyê divê tenê di gotinê de nemîne. Ji bo vê pêwîstî bi rêxistiniyê heye, bi pêwîstiyê heye. Wezîfe û berpirsyariya vê demê de ku têkoşîna li dijî komploya navneteweyî bi vî rengî bê pêşwazîkirin.”
