Nûman Kûrtûlmûş beşdarî “Merasîma Vekirinê ya Sala Akademîk a Sala Perwerde û Hîndekariyê 2025/2026” a li Zanîngeha Dîcleyê bû. Kûrtûlmûş li vê derê axivî û diyar kir ku Tirkiye divê êdî ne li ser çekan lê li ser azadî, demokrasî û yekîtiyê biaxive.
Kûrtûlmûş bi dewamî got, “Em ê vê carê bi ser bikevin. Vê carê wê aştî, xwişk-biratî û aramî serwer bibe. Tirkiyeyê di komîsyonê de nîşan da ku ew aramiyê, xwişk-biratiyê dixwaze.”
Kûrtûlmûş diyar kir ku “Pêvajoya Aştî û Civaka Demokratîk” bi beşdariyeke berfireh a civaka sivîl bi pêş ve diçe û got, “Li komîsyonê li nêzî 130 saziyên civakî yên sivîl hate guhdarîkirin, her kesî fikrê xwe anîn ziman û hemûyan jî hevokeke hevpar gotin: Em dixwazin li vî welatî êdî çekan binax bikin, ne zarokên vî welatî.”
Kûrtûlmûş îdîa kir ku tecrûbeya demokrasiyê ya Tirkiyeyê dikare ji herêmê re bibe mînak û xwişk-biratî, edalet û demokrasî weke “sê sparteyên bingehîn ên paşerojê” pênase kir.
Nûman Kûrtûlmûş got, “Înşaleh dema ku ev tecrûbeya Tirkiyeyê bi serketî qediya, wê li gelek zanîngehên cîhanê ev tecrûbeya aştiyê ya Tirkiyeyê bê xwendin û ji cîhanê re bibe modeleke mînak.”
Kûrtûlmûş her wiha bal kişand ser girîngiya zimanê dayikê û got, “Zimanê dayikê bi qasî şîrê dayikê helal e. Li vî welatî nabe ku kes ji ber zimanê xwe bikeve ber lêpirsînê. Ji ber ku ziman cihê herî nêz ê dilê mirovan e. Cihêkariya navbera zimanan ti carî bi me re nîne.”
