Di 15’ê Cotmehê de hezar û 500 girtiyên li girtîgeha Qizilhesar ya li Îranê ku cezayê darvekirinê bi ser wan de hatiye sepandin, dijî cezayên darvekirinê dest bi greva birçîbûnê kirin. Di nava çend rojên borî de 17 girtî li girtîgehê hatine darvekirin.
Li gorî malpera Dengê Binçavkiriyên Kurd û Îranî, greva birçîbûnê ya girtiyan bê navber dewam dike. Li gorî heman çavkaniyê gelek girtiyan wek nerazîbûna dijî darvekirinan, dest bi dirûtina lêvên xwe kirine.
Tê gotin rewşa tenduristiyê ya gelek girtiyan xirab bûye, gelek girtiyan lêvên xwe dirûtine û hêzên ewlekariyê hewl dane girtiyên ku lêvên xwe dirûtine, cûda bikin. Tê gotin girtiyan rê nedaye hevalên wan ji wan werin qutkirin.
Li gorî heman çavkaniyê duh bi şev gardiyanan gefa cezayê hucreyê li girtiyan xwariye, lê girtiyan ragihandiye ku ew ê dev ji çalakiya xwe ya greva birçîbûnê bernedin.
Hêjayî gotinê ye beriya du rojan girtiyên siyasî yên jin ên li Girtîgeha Evînê jî bi daxuyaniyekê, piştgirî dan greva birçîbûnê ya li Qezalhasarê. Di daxuyaniyê de hat gotin ku divê xwepêşandanên li dijî cezayê darvekirinê bibin fikarek hevpar a civakê.
