Tevî ku mafê wî yê berdana şertî hebû jî, lijneyê Mehmet Sayilgan bi hinceta ku “di qawişê alîgir de ye” û “ne amade ye ku tevlî civakê bibe” biryara neberdanê da. Berdana wî berê pênc caran hatibû paşxistin.
Bavê Mehmet Sayilgan Ramazan Sayilgan, bi tundî nerazîbûn nîşanî biryarê da û got, “Ew bi gotinên pêvajoya Aştî û Civaka Demokratîk re dikevin nava nakokiyan.”
Ramazan Sayilgan got, “Bêyî ku der barê Mehmet de delîlek ango şahidek hebe, ceza hat dayîn. A rastî ev ceza ne tenê ji Mehmet re, ji bo me hemûyan hatiye dayîn. Bi hezaran kes tevlî Cejna Newrozê bibû. Ew bi cezakirina çend kesan re, hewl didin pêşî li ziman û çanda me bigirin.
Ger behsa aştiyek rastîn kiribana, niha Mehmet û yên mîna wî ji mêj ve serbest hatibana berdan. Lê hê bi biryara Lijneya Rêveberî û Çavdêriyê tê dirêjkirin.”
Mehmet Sayilgan ku di 14’ê Tîrmeha 2016’an de li Wanê hatibû binçavkirin û paşê hatibû girtin, girtiyekî nexweş e û ji sedî 80’ê nabîne. Tevî ku gelek caran ji ber rewşa tenduristiya wî daxwaza berdanê hate kirin jî, her carê daxwazên wî bi hincetên cuda tên redkirin.
