Dewleta Tirk li Sûriyeyê gelek bargehên nû ava kirine û di heman demê de wê ji 3 hezar û 500 biyaniyan re nasnameya Sûriyeyê bide çêkirin û wan li wir perwerde bike.
Berdevka Ofîsa Têkiliyan a PYD`ê Leyla Ehmed têkildarî dayîna nasnameya Sûriyeyê ya ji 3 hezar û 500 çeteyên beyanî re û zêdebûna baregehên dewleta Tirk a dagirker yên li bajarên cuda yên Sûriyê ji ANF`ê re axivî. Leyla Ehmed diyar kir ku ew ê bi hevgirtina pêkhateyan Sûriyeyeke nenavendî ava bikin.
Leyla Ehmed di destpêka axaftina xwe de diyar kir ku dewleta Tirk dixwaze li hundirê Sûriyeyê aloziyan kurtir bike û got: “Dewleta Tirk bi DAÎŞ’ê dest pê kir û DAÎŞ perwerde kir. Bi her şêwazî ji wan re bû alîkar, piştî wê jî xwest aboriya Sûriyeyê hilweşîne, dar û zeviyên gel dizîn û dibirin. Li Efrînê bi hezaran hektarên erdî ji aliyê çeteyan ve hatin desteserkirin. Êdî em dibînin ku dema li Sûriyeyê qala çareserî û lihevhatinê tê kirin, dewleta Tirk aloziyeke derdixe.’’
DIXWAZIN DI NAVA GELÊN SÛRIYEYÊ DE DIJMINAHIYÊ ZÊDE BIKIN
Leyla Ehmed destnîşan kir ku dewleta Tirk dixwaze bi rêya van çeteyên biyanî, pirsgirêkan li hundirê Sûriyeyê kûrtir bike û ev yek anîn ziman: “Dewleta Tirk nasnameyan dide biyaniyan da ku projeyên xwe yên destdirêjiya di nava Sûriyeyê de, berfirehtir bike û wan bidomîne. Li berava Sûriyeyê bi hezaran carî êrîş pêk anîne, bi hezaran komkujiyên cuda pêk anîn. Di heman demê de jî li ser gelê Suwêdayê jî serî li heman rêbazan da. Armanca dewleta Tirk ew e ku di navbera gelên li Sûriyeyê de, dijminahiyê derkeve û ew li ser maseya diyalogê li hev nekin.”
Leyla Ehmed piştre da zanîn ku dewleta Tirk û çeteyên girêdayî wê bi rengekî hovane komkujiyan dikin û got: ‘’Bi hezaran ji malbatên ji bajarên cuda ji neteweyên cuda yên ji Sûriyeyê ber bi Bakur û Rojhilatê Sûriyeyê ve bi rê dikevin. Êdî nikarin li cih û warên xwe bijîn. Ger bixwazin li ser erdê xwe bijîn jî wê bên qetilkirin, mecbûr dibin ku ber bi herêmên Rêveberiya Xweser ve biçin û li wir bi awayekî ewle bijîn. Niha bi sedan ji wan kesên berbehs di nava saziyên me de cihê xwe girtine û bi me re kar dikin. Em jî bang li saziyên peywendîdar dikin ku divê ew kesên ne ji Sûriyeyê yên beyanî û aloziyan kûr dikin, ji Sûriyeyê derkevin.’’
DIXWAZE VAN BIYANIYAN LI SER EWLEHIYA SÛRIYEYÊ BIKIN GEF
Leyla Ehmed di dewama axaftina xwe de bal kişand ser mînakên destdirêjiyên dewleta Tirk û çeteyên girêdayî wê yên li herêmê û axaftina xwe bi van gotinan bi dawî: ‘’Gelek mînakên destdirêjiya dewleta Tirk hene. Di berxwedaniya Kobanê de herî zêde dewleta Tirk alîkarî da çeteyên DAÎŞ’ê. Dewleta Tirk a dagirker pirsgirêkan zêde dike û dixwaze dewletên cîran jî bi xwe re têxe nava wan aloziyan. Hikûmeta Demkî ya Sûriyeyê a niha wan biyaniyan perwerde dike û dixwaze bi rêya wê yekê jî aloziyên li Sûriyeyê de kûrtir bike. Ew dixwazin wê yekê bikin û gefan li Rêveberiya Xweser bixwin. Li gel Rêveberiya Xweser her tişt bi edalet û wekheviyê bi rê ve diçe. Lê belê dewleta Tirk dixwaze bi van rêbazên xwe wan biyaniyan li herêmê bike gef. Divê hemû neteweyên li Sûriyeyê bi yek rihî hev bigirin da ku em Sûriyeyeke nenavendî ava bikin. Em bang li her kesî dikin ku êdî em hevgirtina hev bikin û em li hemberî her cure destdirêjiyan li ber xwe bidin. Em dikarin bi hev re çareseriyê peyda bikin.’’
