Parêzer Mistefa Şêx Mislim têkildarî mafê hêviyê ya ji bo Rêberê Gelê Kurd Abdullah Ocalan û nêzikatiyên dewleta Tirk ya dijhiquqî ji ANF`ê re axivî. Mistefa Şêx Mislim got ku dewleta Tirk a dagirker hiqûqê bi kar nayîne û ew tenê di çarçoveya berjewendiyên we de tev digere.
Mistefa Şêx Mislim di destpêka axaftina xwe de anî ziman ku ev zêdeyî 26 salan e Rêber Apo bi awayekî dijqanûnê tê rehîngirtin û ev yek anîn ziman: ‘’Rêber Apo nûnertiya gelekî dike û ji bo mafên neteweyan têdikoşe. Piştî ku Rêber Apo dîl hate girtin, weke kesekî sûcdar hat tawanbarkirin. Rêber Apo ji bo pirsgirêka tevahiya gelên li Rojhilata Navîn rabû û bû cihê çareseriya tevahiya netew û gelan. Her wiha Rêber Apo herî dawiyê jî got ku biratiya me ya Kurd û Tirkan ji hezaran salan e.”
Mistefa Şêx Mislim piştre destnîşan kir ku dema wê hatiye ku êdî divê dewleta Tirk a dagirker jî gavan biavêje û got: ‘’Ji aliyê Rêber Apo û PKK`ê ve gelek gavên cidî û dîrokî yên weke xwefesixkirin, çekşewitandin û herî dawiyê jî gava dîrokî ya vekişandina gerîlayên Azadiya Kurdistanê ya Bakurê Kurdistanê hatin avêtin. Lê belê heta niha ji aliyê dewleta Tirk a dagirker ve tu gavên cidî nehatine avêtin. Dem hatiye divê êdî dewleta Tirk gavan biavêje. Rêber Apo bû dengê tevahiya gelên bindest. Berdana Rêber Apo di rojeva Tirkiyê de bi rengekî lawaz tê nîqaşkirin, dive êdî bi rengekî berbiçav gav bên avêtin.”
Mistefa Şêx Mislim di dewama axaftina xwe de got ku divê azadiya fîzîkî ya Rêber Apo were dabînkirin û ev yek anîn ziman: ‘’Li gorî civîna dawî ya di meha Îlonê de divê di çarçoveya ‘Mafê Hêviyê’’ de Rêber Apo vî mafî bi kar bîne. Lê belê dewleta Tirk ew yek paşguh kir. Heta niha jî ji aliyê dewleta Tirk a dagirker ve tu pêngav nehatine avêtin. ‘Mafê Hêviyê’, mafekî cîhanî ye, divê êdî wê yekê ber çavan bigirin. Dewleta Tirk dixwaze hemû qanûnan li gorî xwe û li gorî berjewendiyên xwe bi rêve bibe.”
Mistefa Şêx Mislim di dawiya axaftina xwe de bal kişand ser mafê tevahiya gelan û got: “Dewleta Tirk her tim qanûnan binpê dike. Ev yek rewşeke siyasî ye. Dewleta Tirk van yekan li gorî berjewendiyên dike. Rêber Apo xwedî proje û dozekê ye, bi milyonan însan jî berê xwe didin vê doze, niha jî gelek kes dibin asteng da ku Rêberê me di zîndanê de bimîne. Lê belê em dixwazin demildest Rêber Apo were berdan û em Rêberê xwe di nava xwe de bibînin.”
